Dan ennawntute an thukhawm

Vawiin (30.5.2025) khan Mizo Inneih, Inthen leh Rokhawmna Dan (The Mizo Marriage, Divorce and Inheritance of Property Act, 2014) ennawntu review committee chu an chairman Zahmingthanga Ralte, Additional Secretary, Law and Judicial Department hoin Secretariat Conference Hall, MINECO-ah an thukhawm.

Zahmingthanga Ralte chuan committee member-te chu an mawhphurhna an tihhlawtlin avangin lawmthu a hrilh a, he dan siamthatna tura ngaihtuahna sengtu leh rawtna thehluttute hnenah lawmthu sawiin, 'He dan hnuaiah hian Mizo hmeichhiate’n ro an khawm theihna tur leh nupa inthenna a thlen chang a hmeichhiate chanvo tur te tarlan a ni a, hei hi Mizo hnam tan thil chhinchhiah tlak tak a ni,' a ti.

Tun hnaiah a mipa zawk Mizo ni hauh lote leh Mizo hmeichhiate he dan hnuaia inneihtir eng emaw zat an awm tih sawrkar chhinchhiahna atangin a lan thu sawiin Review Committee Chairman chuan, 'Hetiang inneihna hi dan mit atanga inneihna tling lo a nih avangin inneihtirtu (license holders) zawng zawngte fimkhur lehzual turin a ngai,' tiin he dan hnuaia inneihna licence kawl zawng zawngte leh kohhran hrang hrang a mite chu he Mizo Inneih, Inthen leh Rokhawmna Dan, 2014 hi chiang taka chhiar thin turin a chah.

Review Committee hian rawtna eng emaw zat a siam a, a tlangpuiin dan dinglaia thil fel tawk lo siamthatna tur a ni hlawm. A dan hming hi a sei deuh avang leh hetiang lam dan dangte hming enkual a nih hnuah he Dan hming thar atan ‘The Mizo Marriage and Inheritance of Property Act’ (Mizo Inneih leh Rokhawmna Dan) tih mai ni se tiin rawtna siam a ni. Heng rawtna hrang hrangte hi sawrkarin a pawm chuan Assembly Session-ah dan dinglai siam tha tura bill put luh a ni ang.

Vawiin thutkhawm hi Review Committee thutkhawm vawi thumna niin, Central YMA, MHIP Headquarters, MUP Headquarters aiawhte leh Mizoram BAR Association aiawhte bakah helama mi thiam bikte an tel a ni.