Myanmar sipai thawnlet

Siaha District ep Chin State, Myanmar-a Myanmar sipai 30 chu nimin (29.11.2023) khan Mizoram chhung (Siaha District-ah) an rawn tlanlutin, Assam Rifles hnenah an inpe. Myanmar sipaite hi vawiin khan thawnlet an ni.

Bengvarna thudawn danin, Myanmar sipai Mizorama rawn tlanchhiate hi Lailenpi, Chin State-a awmte nia hriat an ni. Lailenpi-a Myanmar sipai camp chu November 27, 2023 Chin National Army kaihhruaiin mipui sipai te'n an bei a ni. 

Myanmar sipaite chu tukin dar 9:30 Tuipang Helipad atangin India helicopter hmangin Myanmar pan tura thawnkir an ni. Myanmar sipaite hi tum hnihah Tuipang atanga thiar chhuah an ni a, Moreh panpui niin Moreh atangin Tamu panpui an ni dawn nia thudawn a ni.

Champhai District hnaih lam Myanmar chhung Khawmawi, Rihkhawdar leh Tuibual camp-a Myanmar sipai eng emaw zat chu Champhai District-a an rawn tlanchhe tawh a, helicopter hmangin Myanmar-a thawn turin Manipur-ah dah an ni.

Nimina Siaha District chhunga rawn tlanchhiate nen hian Myanmar sipai Mizorama rawn tlanchhe zawng zawng chu 100 an chuang tawh.