Truck tlan phal loh hriatthiam har ti

Mamit Truck Owners Association (MTOA) chuan thuchhuah siamin, an theih ang angin mipui rawngbawl nan leh an eizawn ve nan theihtawp chhuahin mipuite mamawh phurh hna an thawk ve thin tih tarlangin, 'Bungrua leh eitur mamawh phurhna kawngah pawh mipuiten harsatna kan tawh thinte pawh theih ang ang a sut kian hna kan thawhna kawngah mipuite tawiawmna kan dawng thin a, lawmawm kan ti hle,' an ti. 

Ni 23.07.2024 (Thawhlehni) a Langkaih Group YMA, Taitesena Group YMA, Hachhek Constituency huam chhunga VC te, All Political Party, Hachhek Constituency Maxi Cab Welfare aiawh te YMA Run, Kawrthah Hmarvenga kalkhawmte thu tlukna chuan ni 25.07.2024 (Ningani) atangin NH 44A, Darlak to Tuidam (via Sabual lui) chu HMV leh MMV chin te he kawnga tlan ve an phal lo tih tarlangin MTOA chuan, 'Hriatthiam har kan ti. Hei hian Superintendent of Police, Mamit District-n ni 01.07 2024 a helai kawng a lirthei tlan dan tur notification a chhuah palzutna leh zah loh na nasa tak niin kan ngai,' tiin helai kawnga tlan thin motor lian hmanga eizawngte tan harsatna nasa tak a thlen bawk thu an tarlang. 

MTOA tarlan danin, tun dinhmunah NH 44A kawngthar hi ruah a sur chuan eng motor tan mah zawh ngam chi a ni lo. Ni 25.07.2024 (Ningani) ah pawh kawng hlui lam tlan phal loh a nih tawh a vangin motor lian load la laklawh eng emaw zat an tlan a, kawng diak, chhaklam leimin hlauhawm ah tam tak tangin JCB hmanga pawh chhuah zel an ni. Tam tak chu helai hmun atang hian load la loin an let leh. Mamit khua a in sa mek tamtakin balu tha tlachhamin harsatna an tawk mek a ni.

 Sorkar hotute, MLA te leh department lama thawktute nan harsatnate sutkian sak turin an ngen tak meuh meuh tih tarlangin MTOA chuan, 'Tin, kan SP zahawmtak pawh a thuchhuah tawh anga helai kawng NH 44A Darlak to Tuidam (via Sabual lui) kan zawh ve theih nan a tul anga duty min dahsak turin kan ngen a ni,' an ti. 

MTOA chuan an ngenna leh beiseinate tih hlawhtlin a nih loh a, NH 44A kawngthar siamthat thuai a nih loh a, kawng hlui lama an tlan ve Hachhek Constituency huamchhunga NGO kalkhawmten an phal loh zel chuan Mamit kawtchhuahah Hachhek Constituency lam atang lokal lirthei eng chi pawh tlan tlang a rem tawh bik loh tur thu tarlangin, hetiang boruak a thleng palh a nih pawhin mipuite an harsatna tawhte hriatthiampui hram hram turin an ngen.