CM leh AAI hotute inkawm

Vawiin (29.4.2025) tlai khan Chief Minister Lalduhoma chuan a office-ah Airport Authority of India (AAI) hotute - Dr. Sharad Kumar, Member (Operations); M Raja Kishore, Regional Executive Director, NER leh an thawhpuite a kawm a, AAI kuta Lengpui Airport hlan chungchang a sawipui.

Chief Minister chuan, tun hma atang tawhin AAI kuta Lengpui Airport enkawl hna hlan tuma hmalakna a awm tawh thin tih sawiin, 'Keini pawhin kan ngaihven nghal. Amaherawhchu, kan beisei angin thil a kal tluang lo a, duhthlan tur dang, Mizoram tana tha tawk tak a lo awm bawk si avangin chung mite nena indawrnate chu kan kalpui a ni,' a ti.

Tun hnaiah Union Home Minister Amit Shah nena kan inkawmnaah AAI nena indawrna thar thawh leh tha an tih thu sawiin, 'Ti hian kan han indawr thar leh ta a ni. AAI lamin Lengpui Airport zirchiannate han nei ula, in thu leh hla a zirin kan kal zel dan tur kan sawiho dawn nia,' tiin AAI thuneitute hi a chah a ni.

Union Home Minister leh Chief Minister ten Lengpui Airport AAI kuta hlan chungchanga inbiakna thar neih an rel hnu hian Vanlaldina Fanai, Commissioner & Secretary to CM chu Delhi ah kalin April 16, 2025 khan Ministry of Civil Aviation Secretary leh AAI hotute nen meeting an zui nei nghal. An meeting ruahmanna angin AAI Team-te hian Mizoram an rawn tlawh ta a ni.

AAI hotute hian Lengpui Airport tih changtlun nghal ngai zual nia an hriatte leh hma an lak zel dan turte Chief Minister hnenah hian an tarlang. Inkawmna hun tha tak a siamsak avangin lawmthu an hrilh a ni.

Chief Minister hi TBC Lalvenchhunga, Adviser to CM, Vanlaldina Fanai, Commissioner & Secretary to CM leh Mizoram Civil Aviation Wing hotuten an tawiawm a ni.