Mihring tana eitlak loh buhfai an pe - MPYCC

Mizoram Pradesh Youth Congress Committee (MPYCC) chuan vawiin (19.9.2024) hian Zuangtui kudama buhfai dahna in pathum an endik a, ZPM Sorkarin mihring tana eitlak loh buhfai mipui ei turin an pe niin an tarlang.

MPYCC President Laltawnliana chuan ration buhfai chhia ei ngaihna an hre lo tih sawiin, 'Vawk pul hri avangin vawk chaw atana hman theih a ni loa, lei tha atante an hmang mai mai. Hetih lai hian ZPM Sorkar chuan ration buhfai kg 1-ah cheng 30 (100%) in October thla atanga a tihsan tur chu Mizoram mipui an lungngai takzet a, kan sorkar hrawn mek hian miretheite lû chunga vaivut takngial pawh an ît a, pachhiate an rûksak mek a ni,' a ti.

MPYCC tarlan danin, Central Sorkar atanga buhfai a thlawna kan dawn bak hi a supply tu tur Mizoram sorkar chuan tender chhuahin a thlang thin. Mizoram hian thla 1-ah Buhfai quintal 59,478 a thlawnin sorkar laipui atangin kan dawng thin a, hemi baka kan mamawh nia Supply Minister-in a sawi chu quintal 37,522 a ni.

ZPM Sorkarah buhfai supply hna chhangtu pariat awmin, RL Store, Kulikawn Aizawl chuan chhang hniam berin, buhfai quintal 1-ah Rs. 3,400.50 in an supply thei. Buhfai supply tur thlanna (limited tender) ah a chhang hniam ber pek ni lovin an duhsak zawng te hnenah Rs. 3,550/- in supply tir an ni a, a supply tu turte hian midang supply tir lehchhawn nia hriat a ni. 

Buhfai supply tur thlan danah thil dik lo tam tak a awm nia an hriat thu tarlangin MPYCC chuan, 'Chuvang chuan mipui hnena thil nihna dik tak puang chhuak turin ZPM Sorkar hi kan phut tlat a ni.

Hetianga uchuak taka induhsakna hleihluak tak avang hian kum khatah Mizoramin Rs. 67,314,468 a chawi thlawn dawn a, mi tlemte hlawkna Mizoram mipuiin an tuar chho zel tur hi a vanduaithlak.

MPYCC chuan ZPM Sorkarin buhfai tha lo mipui hnena a semchhuah hi an office-ah a duh apiang tana en theiha a awm reng thu an tarlang. Zuangtui kudam an tlawh zawh hian MPYCC buhfai tha lo nia an sawi hi Chief Minister en turin CMO-ah an pe.