SHC inthlan atan campaign kick off

ZPM leh Hmar People’s Convention (HPC) chuan vawiin (15.10.2024) khan Sinlung Hills Council (SHC) inthlan lo awm tur atan Sakawrdai, Saiphai leh Suangpuilawnahte campaign an kick off a, thusawitu Chief Minister Lalduhoma chuan SHC mipuite chu nghet taka mi rinawm lote zui an bat nia a lan loh thu a hrilh.

Lalduhoma chuan tun hmain hun rei tak chhung Hmar mipuite sawrkarin a enkawl danah lungawi loin ralthuam lekin hun an lo hmang tawh thin tih sawiin, 'Ralthumte tunga inremna thuthlung ziah a nih hnuah pawh, chu inremna chu tihhlawhtlin lohin a la awm reng a ni. Chuvangin nghet taka mirinawm lote hnung zui hi in bat niin a lang lo. Phuahchawp takin he council hi hun rei tak a lo kal tawh thin a, chairman pawh an duh duha an thunun theih an dah thin a ni. Sinlung Hills Council-in dan mumal tak a neih theih nan theih tawpin kan lo au ve tawh thin a, chumi hnuah Rules siam niin, hun rei tak hnuah act mumal tak kan lo nei ta,' tiin a kalkawng a thui thu a sawi.

Tuna Mizoram Sawrkar hi mipuite nen tangrualin an din a nih thu sawiin Chief Minister chuan, 'SHC inthlan kan hmachhawn turah pawh hian HPC mipuite nen kan tang tlang leh dawn a ni a, a thlamuan thlak hlein ka hria. He council tan hian sawrkar hmasa huna laiin nuai 150 an pe thin a, a bei tham hle tih kan hriatin sorkar thar chuan nuai 150 bakah nuai 190 kan pek belh. Chumai bakah Lok Sabha MP Pu Richard Vanlalhmangaiha chuan a MP Fund atangin nuai 75 a rawn theh chhuak. SHC-in hma a lo sawna, leirem a lo rah zel theih nan kan candidate duhawm tak takte hi lo vote tling ngei turin ka ngen a che u,' a ti.