Dinthar khawtlangin kawng an zawh

Dinthar Veng khawtlang chuan heroin hawng 440 kaihhnawiha an veng mi Henry Lalbiakzinga Chhundeng man a nih kal zelah vawiin (11.4.2025) hian an vengah kawng an zawh.

Dinthar Veng kawn atangin kawng hi zawh tanin 'Dinthar Vengah ruihhlo zuar kan duh lo', 'Kan sorkar hian hawng 440 a inhnamhnawihte hi na takin hrem rawh se', 'Dinthar khawtlang hmelhma kan do zel dawn', 'Thalaite nunna suattu kan do zel dawn' tih leh a dangtein an aurual a, Henry Lalbiakzingate in kawtah resolution an pass hnuah an tindarh.

Henry-ate in kawtah hian Dinthar Veng Local Council, YMA, JAC, MUP leh MHIP-te buatsaih resolution pathum pass a ni. Henry-ate in bul velah police pawh eng emaw zat an duty a, buaina chhuak a awm lo.

Dinthar Veng resolution : 

1. Ram leh hnam hmelma, nunna suattu heroin hawng 440 Henry Lalbiakzinga Chhundeng s/o R Malsawma, Dinthar Veng man sak a ni hi lawmawm kan ti, a phu tawka hremna pe ngei turin thuneitute kan phut tlat a ni

2. Ruihhlo dona kawnga theihtawp chhuaha hma kan lak reng laia, ruihhlo tawlhrukna lianthama Dinthar Veng mi a lo inhnamhnawih hi pawi kan tiin kan dem takzet a ni. Dinthar Vengah ruihhlo leh a zuartute tana hmun a awm lo tih vawiin hian puang nawn leh e

3. Zu leh ruihhlo chi hrang hrang zuartute tan Dinthar Vengah hmun a awm lo tih kan puang a, khawtlangin inthurualin, nasa zawkin kan do zel ang