MLA-in vawk thi phumna hmun a tlawh
admin 13-Apr-2025 02:51 PMSiaha Bialtu MLA Dr K Beichhua chuan nimin (12.4.2025) zing khan Siaha khaw chhunga African Swine fever (ASF) avanga vawk thite phumna hmun a tlawh a, LAD Department leh AH & Vety atanga official-te bakah Joint VC leh Meisatla Village Council hruaitute'n an tlawh.
Siaha District khaw hrang hrangah ASF avangin vawk tamtak a thi tawh a, Siaha khawpui chhungah he thuziahlai hian ASF vanga vawk thi leh suat (culled) hi hriat theih chinah 912 lai a tling tawh a, nitin an la thih belh zel tura ngaih a ni.
Dr K Beichhua sawrkar hmasa lam atang tawh khan ASF hian Mizoram pum nasa takin a nuai tawh tih sawiin, 'Vawk tam tak a thi a, vawk vulhtu chhungkua tamtak eizawnna in nasa takin a tuar a ni. Mizoram Sawrkarin Sawrkar Laipuiah nasa taka a nawrna zarah ASF lenna Mizoram District 10 a vawk vulhtute hnenah compensation pek an ni,' a ti.
Vawk suat loha thite erawh chu state-in a disaster-a a puan theih loh avangin compensation pek theih an nih loh thu sawiin Dr K Beichhua chuan, 'Tuna Siaha District-a thil thleng hi sawkarin disaster-ah a puang tawh,' tiin compensation pawh Disaster Management & Rehabilitation atanga pek theih dinhmunah an din tawh thu a sawi.
Siaha Bialtu MLA chuan vawk suat leh suat loha thite compensation an pek thawm erawh hriat a la ni lo tih sawiin, 'Vawk vulhtute an lainatawm hle a, tun kan sawrkar pawh hian a la pe ngei tur ah beisei ila chutiang tur chuan i lo thlir ang u,' a ti.
Dr K Beichhua chuan vawk suat leh thi phumna tur laih ringawt pawh hi JCB leh mihring tha tamtak a ngaih bakah, bleaching powder leh chinai (lime) phulte leh nilenga duty tur rawihna manahte sum senna tur thahnem tak a awm avangin State Vety Department pawhin tuna an hmalakna ai a chak zawka hma la se a duhthu a sawi.
