Dan loa lakte dah ngheh theih loh - H Lalengmawia

Chief Secretary charge la mektu H Lalengmawia chuan vawiin (15.4.2025) chawhma dar 11 khan CS Conference Hall-ah press conference neiin, CSS hnuaia dan loa lakte chu dahngheh theih an nih loh thu a sawi.

H Lalengmawia chuan CSS hnuaia thawk tam tak chu dik lo leh mumal lo taka lak an nih thu dawiin, 'Advertisment a awm loa, DPC kaltlanga lak pawh an ni lo. Recruitment mumal taka open competition kaltlanga lak ni lo, induhsakna vanga appoinment pek tawp ang kha an tam hle. Heng ang chi ho tan hian CSS Regularisation Scheme hi a hman thei loh,' a ti.

Lak dan mumal lo taka lakte hian seniority pawh an nei hlei thei lo tih sawiin H Lalengmawia chuan, 'Mumal lo taka lakte hian seniority pawh an nei hleithei lo a ni. NHM leh SSA employee zingah hian hetiang hi an tam zual niin a lang. Regularisation kalpui tura thil tul leh pawimawh tak, inter seniority ptihfel pawh a har hle niin a lang,' tiin dan loa lak tam berna NHM leh SSA hnuaia thawkte chuan harsatna an tawk nasat ber thu a sawi.

H Lalengmawia chuan sorkar tharin CSS-a thawkte hmakhua ngaiin CSS Employees Regularization Scheme a tih chhuah thu sawiin, 'He scheme hi dan mit atanga fihlim thei ang ber turin duan a ni. Public appoinment (sorkar hna lak) chungchangah hian Article 14 & 16 of the Constitution hi bawhchhiat thiang lo a ni. He scheme hi dan anga lak CSS emoployee-te'n an hmang thei ang,' a ti.

CSS hnuaia dan loa lakte chu an duh vanga dan loa lak an nih bik loh thu sawiin, 'Chutihrualin dan loa lak an nih miau avangin dah ngheh theih an ni lo. Dan loa lak an ni tlat si. Dah ngheh an nih chuan an tlukpuite'n court-ah sorkar a khin chuan thiam a chang dawn lo sorkarin. Mi zawng zawng ang khata en a ngai,' tiin sorkar hnathawk dahnghet turin Article 14 & 16 of the Constitution  bawhchhiat a thian loh thu a sawi.

H Lalengmawia chuan All Mizoram CSS Employees Coordination Committee (AMCECC) ten lungawi lohna an lantir chu titawp tura an ngen nawn leh thu sawiin, 'Tunah hian sorkarin hreh tak chungin 'no work no pay' a kalpui mek. Hetianga lungawi lohna an lantir chuan rilruna tak chungin sorkarin a tih turin tiin, service in tihtawp thlengin thil a kal palh ang tih a hlauhawm,' a ti.

AMECC-te thil phut ti hlawhtling tur chuan India Constitution bawhchhiat a ngaih dawn avangin, sorkar tan chuan thil tih theih a nih loh thu H Lalengmawia chuan a sawi a, court judgement lo awm tawhte pawh a tarlang.

H Lalengmawia sawi danin, CSS employee dan dik taka lak (advertisment chhuah thlap, DPC/DSC ngeiin an lak, kum dik leh thiamna qualification dik neite leh kum over lote) te chu CSS Employees Regularization Scheme hnuaiah sorkarin a tul a tih ang zelin dahngheh an ni dawn.

Tarlan tawh angin AMECC chuan sorkara an lungawi lohna lantirna atan vawiin atangin pen/tool down strike an kalpui a, April 17, 2025 thleng kalpui an tum a, an thil phut a hlawhtlin loh chuan an kal zel dan tur an rel ang.

AMECC chuan pen/tool down strike neih an tum hi an tarlan tawh thin angin, Mizoram Sorkar an karna leh lungawi loh tum ngawr ngawra ni lo nia tarlangin, Mizoram Sorkar hnuaia CSS-te kan ngheh ve theihna tur dan : Govt. Of Mizoram Regularization of CSS Employees Scheme, 2024  Dt. 18th June, 2024 min siam sak tawh chu a taka a hlawhtling mai tura kan beisei laia, DP&AR(ARW) atanga Office Memorandum (No.B.12018/1/2020-P&AR(ARW) Dt. 21.10.2024) chhuaka checklist in min dal leh tak tlat avanga loh theih lova sorkar kan nawr a ngai hi hrehawm kan ti,' tiin an nawrhna avanga tuartu mipuite hnenah hriatthiamna leh ngaihdamna an ngen.