Mobile phone a neitute hlanlet
admin 10-Jul-2025 04:51 PMLunglei Police chuan vawiin (10.7.2025) chawhma khan Lunglei Police Station-a Cyber Cell -te hmalaknaa mobile phone bo leh ruk zawnchhuah hna CEIR Portal hmang a hmuh let a neitute hnenah an hlanlet.
Mobile phone hlanletnaah hian Lunglei Addl. SP K. Beihmotaosa chuan mobile phone bo hi Lunglei mai ni lo, Mizoram leh India ram hmundangah a tam em em tih sawiin, 'Mobile phone tibo report awm tawh phawt chu a tam thei ang ber theihtawpin chhuichhuah sak zel kan tum. He hlawhtlinna hi CEIR Portal awmze nei taka kan hman tangkai vang a ni. Tunlaiah sualna pung chho zel mila police-te pawh hmasawnna kan nei chho ve zel a tul thu a sawi.
K. Beihmotaosa chuan mobile bo rinhlelh awm tih hre reng chunga lo leisak tute emaw lo thleng tute emaw chungah pawh action lak zel a ni dawn tih sawiin, 'Tun hnaiah hetiang dik lo taka lo leitute hi man an awm nual tawh,' tiin mobile phone blacklist nge whitelist a ni tih Google search hmangin CEIR Portal-ah awlsam tein finfiah theih reng a nih thu a sawi.
Vawiina Lunglei Police-in mobile phone a neitute hnena an hlanlet hi April 2025 atanga July 5, 2025 chhunga an chhui chhuahte niin, mobile phone 20 a ni a, cheng nuai 2.90 man hua chhut a ni. Lunglei Police-te hian vawiina an hlanlet nen hian, mi 170 hnenah an mobile phone bo, an hmuh chhuah sak an hlanlet tawh.
