MLA-in kawng siam mek a tlawh

Adviser to Chief Minister TBC Lalvenchhunga, Aizawl West-I Bialtu chuan nimin (12.4.2025) khan a bial chhung, Ramrikawn to National Highway 54 via Sakawrtuichhhun kawng siam mek a tlawh. He kawng hi December, 2024atang khan Plain Cement Concrete (PCC) a chhun tan a ni a, tunah hian 60% chhun zawh tawh a ni. He hna hi kumin May-a zawh tura ruahman a ni a, kilometer 3 leh a chanve a thui PCC a chhun tura ruahman a ni.

TBC Lalvenchhunga chuan he kawng siam meka hmun thenkhat khi leh hmun hnihah siam that ngai awm chu, mi thenkhatin thuneitute hnena thlen mai loa, social media hmanga insawichhiatna atan an hmang tih sawiin, 'A zia lo hle. He Kawng siamna atana mix design ah hian 1:1.12:2.03 cement proportion hman a ni a, cement bag khatah balu tin hnih leh rora tin thum hman ṭhin a ni,' a ti.

Cement pawh tualchhunga mi hmang loin Ordinary Portland Cement (OPC) hman a ni tih sawiin TBC Lalvenchhunga chuan, 'Kawng hi tlo leh tha tak tura siam a ni,' tiin hmun tlemte kawng siam zawh tawh khik avanga hetia kawng chhe ta vek anga social media-a thehdarha mipui rilru hruaipen tum chu intih hmingchhiat tumna hrim hrim a ang ber thu a sawi.