Beiseina awm chhun kan ni - Dr Vanlalthlana

Vawiin (21.4.2025) hian ZPM chuan an office-ah chhung inkhawm an hmanga, he huna thu sawitu Education Minister Dr. Vanlalthlana zirna kawnga sorkar hmalakna hrang hrangte a sawiin, 'Tun dinhmunah kan ram siam tha tura Pu Lalduhoma kaihruai ZPM Sorkar a that ber a, mipuite beisei innghahna awm chhun a ni,' a ti.

Dr Mathlana chuan sorkarna an chan tirh khan India ram pumpuia zirna tehkhawngah Mizoram chu state leh UT 36 zingah a hniam ber dawttu kan nih thu sawiin, 'Tehkhawng hi Performance Index 2.0 hmanga kalpui niin,  National Achievement Survey (NAS) hnuaiah  uluk taka zirlaite dinhmun zirchian a ni a, kan dinhmun hi a chhuanawm loh hle. He dinhmun hi sorkar hmasaten min chhawm a ni a, ZPM Sorkar tan kan bultanna a ni thung. He dinhmun atang hian midangte umphak tumin thapui thawhin kan tlan mek a, kum 20 leh kum 15 chuang lo sorkar tawhte khan kan ram zirna siam that an tum tak tak em tih chu kan dinhmun atang hian a lang chiang hle a ni. Chuti chung chuan nasa takin min bei a,  min beihna lam apianga hawi hman kan ni lo, state leh UT dangte umphak tumin Mizoram Sorkar chuan hmalam kan pan mek a ni. Sorkar hmasate khan theih tawp an chhuah lo kan ti lo, amaherawh chu min thlenpui chin hi a lungawi thlak loh,' tiin hmasawn kan ngaih thu a sawi.

Education Minister chuan sorkar hmasa khan an term tawp dawn lamah tlanchhe chungin sikul 180 lai sorkar sikulah a puang nia sawiin, 'Dan behchhan tur awm miah loin sikul 52 chu provisional adhoc-ah hlankai an ni a, lumpsum school awmsa leh a thar an puan hi 108 lai a ni.  Upgradation atana sikul an chhawpchhuah thenkhat chu naupang pawh nei lo te, bulding pawh nei lo te, thenkhat awm tawh lo (defunct) tawhte leh khawtlang enkawl pawh ni lo private sikulte an lo awm a, MLA Election awm tur thlir chunga an tih a nih avang khan a phuai luai hle a ni,' a ti.

Tunah hian Mizoram Government School Teacher’s Union (MIGOTSU) ten bagde dum belin sorkarah lungawi lohna an lantir mek tih sawiin Dr Vanlalthlana chuan, 'Education Department-in theih tawp chhuaha an tana hma kan laknate ngaihtuah chuan an lungawizo lo hi mak kan ti hle  a ni. Dan awm sa in sikul upgrade tura a huam lohte pawh an tel theihna turin Dan kan siam belh mek a, an tana hma kan lakna hi ngaichang thiam sela kan duh hle . College lamah pawh  Siaha, Lawngtlai leh Kalmanagar College te an indaih lo viau emaw kan tih laiin Aizawl a kan college te pawh an lo indaih lo hle mai,' tiin MPSC kal tlangin lecturer 30 direct a lak an tum mek thu a sawi.