Hriatrengna banner tar

May 28, 2024 (Thawhlehni) a Cyclone Remal avanga leimin nasa tak tuar Hlimen Veng chuan, kha chhiatna avanga nunna chantate hriatrengna banner lian siamin, an veng kâwn laiah an tarchhuak. 

Kha chhiatnaah khan Mizo panga leh hnamdang pali, an vaiin mi 9 an thu. Mizo thite hi chhungkaw pahnih, niin chhungkaw pakhat zawkah hian vanneihthlak takin an fanu a dam chhuak a, midang pahnih an thi. Naupang dam chhuak hi Pathianin a awm pui a, tunah chuan nunphung pangngai takin an nung tawh a ni Chhungkaw pakhat zawk hi an fanu pakhat awm loh lai a ni a, inah awm pathumte chu an thi vek.

Kha chhiatna avang khan chhungkaw 79 te chenna hmun chu danger area-ah sorkarin a puang a, chhungkaw 42 te chu relief camp ah awmin, midang zawng hian hmun dangah inte an luah a, chhungte fin pawh. Relief camp-a awmte hi January 2025 thleng awm tura ruahman an nih angin, huntiam a ral hnuah a tam zawk chu an chenna ngaiah let lehin, thenkhatin in luah turte an zawng. Chhungkua tlem a zawng erawh vawiin thlengin he hmunah hian an la awm a ni. 

Fur kan hmachhawn leh mai dawn si a, khawtlang hruaitute mangang chuan Transport Department leh sorkar hotute bia in Relief Camp a awm theih hun chhung chu October, 2025 thlengin pawh sei sak an ni a, tunah hian chhungkaw 39 vel chu relief camp a awm leh tur hian an inbuatsaih mek a ni.

=========