ZPM worker thu thehluh court-in a hnawl - MNF

MNF chuan thuchhuah siamin, MNF General Headquarters chuan ni 16.7.2024 khan press release a tichhuak a, he press release avang hian Hrangchalliana, Ruantlang, Champhai chuan he press release-a hming sign tu Lalthakima, Joint Secretary, Media & Publicity Department, MNF leh Social Media lama post chhawngtu Lalmuanga, Tuirial Airfield-te lakah criminal complaint No. 308/2024 court-ah a thehlut tih an tarlang.

MNF tarlan danin, he a case thehluh hi ni 22.5.2025 khan court chuan order tichhuakin, intihmingchhiatna lam thil a hmuh loh avangin thu tling loah ngaiin a hnawlsak a ni.

MNF Press Release Memo No. 131/2024 dt. 16/7/2024 ah hian Vairengte leh a chhehvel a kuhva rah ro bothlau zawnchhuah tuma hmalakna kal zela Mizoram Police-ten ni 7.7.2024-a Phaisena 407 truck trip 1 leh an lakchhuahna kudam atanga bag 145 vel lakchhuah a nih thu puanzar a nih chungchangah heng kuhva neitu hi Lalchhuanliana, Ruantlang, ZPM Champhai South Block Information Joint Secretary nia hriat a nih thu tarlan a ni. A unaunu chu Ruantlang ZPM VC member niin, a unaunu pasal hi ZPM Champhai South Block President ni a hriat a nih thu pawh tarlan a ni.

ZPM South Block President Hrangchalliana chuan min ti hmingchhia tiin court-ah thubuai a thehlut ta a, a thu thehluhte hi xourt chuan intihhmingchhiatnaah ngai loin, thu tling a ni lo tiin a hnawlsak ta a ni.

ZPM sorkarna hnuaia ruling party mi leh sate huat thu a chhe em em nia tarlangin MNF chuan, 'Hei hi thil vanduaithlak tak, nuihzatthlak takah kan ngai. Thil ho te te-ah FIR thehluh an uar lutuk leh court-a zualko an ching em em mai hian ngaihdan dang neite reng reng an ngaihtheih loh zia leh an beidawn zia a lantir. India danpui hnuaia duh zawng leh vei zawng sawi chhuak thei tura mitinin zalenna kan neih nek chep an tuma a hlawhchham chho zel hi mualphona nasa tak a ni tih hre tur leh a tawpah chuan diknain ro a rel thin a ni tih lo hre thar turin kan chah a ni,' an ti.