Kum 24 mi tuiah a tlahlum

Nimin (28.5.2025) khan Lalzedingliana (24) s/o Lalroa, Pangkhua, Lawngtlai District chu Tuipui, Mizoram leh Tiau Lui, Myanmar infinna lai velah a tla a, he thuziahlai thleng hian a ruang hmuh a la ni lo.

Bengvarna thudawn danin, Lalzedingliana hi a pa Lalroa nen leng deng turin luiah an kal a, lui kalten riahbuk an lo siam saah an chawlhhah dam hnuah Lalzedingliana hi len deng turin a kal a ni. Sangha a man hnuah riahbukah hian letin, pum hmangin sangha man turin a chhuak leh.

Puma sangha man tura a chhuah hnu lawk hian tui a len avangin a in kar tha thei loa, luikal ve thoin a talbuai tih a hriat avangin Lalzedingliana pa hi a hrilh nghal vat. A pa pawh hian a fapa talbuaina lam chu vaukam atangin a pan a, a awmna atanga hmuh phak leh tho a ni.

A pa hian a fapa hi theihtawp chhuah tur te, zam lo turte leh pum atanga chhuk miah lo turtein vaukam atangin a fuih a ni. Lalzedinga hian theihtawp chhuah mah se, tui a len em avangin a inkar thei tawh loa, rei lote hnuah tuiah a zuangthla.

Vaukam lamah hleuh chhuah tum mah se, a thei loa, a hnuah chhuk zawngin a hleuh (a pum zuk man leh a tum niin an ring) a, rei lote hnuah a pil a, a pa chuan theihtawpin a fuih zui a, vawi hnih vel a rawn lan leh hnuah hmuh tur a awm lo zui.

Lalzedingliana hian nupui a neihna a la rei lutuk loa, a nupui nen hian fanu thla li mi an nei hman. A pi leh pu, a  nu leh pate nen in khatah an chengho.