Christina-i'n a sum hman dan a sem

AMC Ward No VIII Corporator Christina Roluahpuii Sailo chuan vaiin (13.7.2025) hian kum 2023-2024 leh 2024 - 2025 chhunga ward fund a hmanna an ward mipuite hnenah a sem. Christina-i hian a ward fund hmanna hi chhungkaw tin hnena a sem bakah, an ward huam chhung veng pathumah whatsapp group-ah an post.

Christina-i chuan a sum hmanna a semah hian thuhmaah, 'Kum 2021-2022 leh 2021-2023 a kan ward tana sum lokal chu in tinah kan sem tawh a, tun tumah chuan sorkar kum liamta 2024-2025 leh kum hmasa 2023-2024 a kan ward tana sum lokal hman a nih dan tarlan a ni ang. Sawrkar kum liam ta hi kum hnih chhung kan tih rual nachhan chu MLA inthlan leh Local Council inthlan avangte a nih bakah, a hun taka fund kan dawn theih ngai loh vang a ni. Campaign laia ka intiam ang ngeiin kan ward tana sum lokalte mipuiin in hriatve zel ka duh a ni. A chhan chu kan ward tana sum lokal hi ka ta ni loin, he ward ta a nih miau avangin ward tana sum lokal a hmanna ward mipuite hrilhhriat hi ka tih makmawhah ka ngai,'a ti.

A tawp kharna atan Christina-i chuan, 'Ka thiam leh phak tawkin kan ward hmasawnna atan hma ka la ve a, min duhkhawpin ka ring hauh lo, kei ngei pawh ka induhkhawp lo. Kan ward tana sum lokal hi tam tham lo hle mah se, a tangkai thei ang bera hman erawh ka tum ve a ni. Ka tlin lo leh fel lohna tam tak in hria ang tih ka chiang a, chungahte chuan hnunglam atanga min sawisel mai loa, min fin chhuah a, a tul chuan min hau bawrh bawrh turin ward mipuite ka sawm a che u,' tiin an ward hmasawnna atan theihtawp chhuahpuiah an ward mipuite a sawm.

Christina-i hian ward committee dinin, ward fund rawn kal zawng zawngte chu ward committee-te a hmanna tur a relpui thin a ni.