CM-in budget dikhlelin a sawifo - MPCC

MPCC Media-te chuan vawiin (28.8.2025) hian Aizawl Press Club-ah press conference koin, Chief Minister leh Minister thenkhatte chu budget chungchang tunhnaiah dikhlel deuha sawifo thinah an puh a, 'RT-a zawhna Finance Department-in an chhanna document-a a lan danin ZPM hian sawrkar an kutken tan December 2023 atanga June 2025 thleng khan cheng vaibelchhe 6214.27 lai an puk tawh a, kum khatah vaibelchhe sangthum chuan an puk tihna a ni,' an ti.

ZPM sawrkar hnu a leibat tak tak chu vaibelchhe 500 tih chu dawt chiang tak a ni tih sawiin MPCC Media chuan, 'CAG-in Mizoram Sawrkar sum dinhmun, unaudited provisional figure thla tin a tarlan thinah hian kum 2024-2025 chhung khan cheng vaibelchhe 3133.45 lai an puk a, budget a puk an tum chu vaibelchhe 1365.70  a ni a, an puk tamna hi 229.44% lai a tling a ni. Kum 2025-2026 budget-ah hian vaibelchhe 1651.68 puk turin an in budget a, June thlenga CAG  report  an tichhuah tawhah vaibelchhe 1178.53 lai an puk tawh a, thla thum chhungin an puk tum zat 71.35% lai an puk tawh,' tiin an puk hnen dawn hle niin an sawi.

MPCC Media-te sawi danin, hetianga an puk chhoh zel chuan term khat chhungin, 'kum 40 chhung lo sawrkar tawh ten engmah an lo ti lo,' 'sum an puk tawk tawk a, mipui min dahkham' titu te hian vaibelchhe 15000 chuang an puk thei dawn. Tuna kan leiba hi 2024-2025 budget-a a lan danin vaibelchhe 14034.76 a ni a, hetiang zela an puk chuan kum 40 lo sawrkar tawhten kum 40 chhunga an bat aiin ZPM Sawrkarin kum 5 chhunga an puk hi a tam thei dawn tihna a ni. Sawrkar leiba kan rulh zel avangin kan leibat tak hi chu a tlem hle, te an ti. Hei te hi chhut chian a ngai hle. 

Sum puk thenkhat chu a pung nena a kum leha rulh nghal ngai te a ni. An sum puk thenkhat hi chu kum 10 hnu-ah a pung mai bakah a capital nena sawrkar lo awm tur ten an rulh ngai a ni. An rulh leh nghal na tur sum an puk thenkhat NABAARD atangte a sum an puk hi a tam loa, mipui hmaa dawt hmanga insawithiam tumna a ni. Sawrkar pawisa puk te hi periodically, hunbi neia rulh tur a ni a, rulh dan pawh RBI in Mizoram  Sawrkar account atangin a lo cut thin a, a hrana rulh a ngai hran lo. ZPM Sawrkar hi hemi kawngah hian an vannei em em zawk. Kum 10 kalta a Congress Sawrkarin Year of Consolidation an puan hlawhtlin em em zar kha an zo a, Sum an puk tlem leh budget surplus hial an lo neih kha a nghawng a lo lang a, sum puk sa rulh tur an neih tam loh phah hle.