Hand holding-ah kan D.A.H - Lalduhoma

Vawiin (28.8.2025) ah Chief Minister Lalduhoma chuan hand holding scheme hnuaiah an D.A.H dah thu sawiin, sawhthing hralhna a fel tawh chin chu an pek zel thu a sawi.

INC member C Ngunlianchunga'n Agriculture Minister PC Vanlalruata a zawhna kal zelah Chief Minister chuan thlai thar leina tur D.A.H dah a nih leh nih loh chungchangah hand holding-in a huam zau thu sawiin, 'Sawhthing chauh a huam lo. Thlai dang, enterpereneur leh innovator-te tan pawh dah vek a ni. Hand holding hnuaiah pawisa kan dahkhawm a, kan la hmang seng lo,' a ti.

Lalduhoma chuan sawhthing hralh zat chu a lut reng a, sum an pe chhuak reng tih sawiin, 'Sawhthing leina kan la pek chhuah loh chhan hi pawisa kan neih loh vang a ni lo a, pawisa neih loh vanga ba kan ni lo. Kan enfiah mek zel a, a fel chin chu kan pe zel,' tiin a pawisa dawngtu tur lamah buai a awm avang la pe chhuak kim thei lo an nih thu a sawi.

Agriculture Minister sawi danin, sawhthing chingve loten hlawkna sawhthingah telve an tum vangin harsatna an tawk. Myanmar atangin sawhthing an lalut a, SCC-ah an lo hralh. Portal-ah an upload tawh si. Social audit neih a ni a, a ching ve reng reng lote an tel si. A bikin khaw chhak lam ramriah chung chu a tam.

Sawhthig atan market intervention scheme (MIS) an dilve a ni. MIS an hmuh chuan direct-a benificiary-te account-ah luh vek a ngai, district level-ah pawh an account-ah a luh vek a ngai. Account-te kan thlak a, hei pawh hian sum pek chhuah a ti muang. Sawhthing hralhna man hi sorkar chuan a pe vek dawn.

August 16, 2025 thlenga report an khaikhawm atangin sorkarin sawhthing a lei chu quintals 3,45,932 a ni a, sawhthing leina atan cheng nuai 95.63 pek chhuah a ni tawh. La pek loh cheng vbc. 45 vel a awm.