Mizoram BJP-in FIR an thehlut

Mizoram BJP (MBJP) chuan vawiin (28.8.2025) chhun khan Aizawl Police Station-ah K&L Production Youtube channel lakah FIR an thehlut.

An thuchhuah tarlan danin, K&L Production hian BJP dik lo taka puhna post a siam chungchangah Aizawl Police Station ah FIR theh luh niin, a tul anga hma min laksak turin an ngen a ni.

MBJP chuan K&L Production-in Central BJP chungchang thudik lo hmanga thu dik lo a sawi niin tarlang a, 'Central Sorkar a kehchhe mek, India ramin harsatna lian tak a tawk mauh mai' tih thupui hmanga an thusawi hi, thubelhchian dawl lo, mipui hruaisual thei a ni,' an ti.

K&L Production thil post chu pawi an tih thu tarlangin MBJP chuan, 'Hetianga mipui rilru hruaidik lo thei tur post hi awm tawh lo se tih hi kan duhdan a ni,' tiin politics kan khel a nih pawhin thudik leh belhchian dawl hmang chauh khelh tur a nih thu an tarlang.