Aizawla damdawi dawrte endik

Aizawl District Magistrate-in naupang kumtling lo leh school uniform haten damdawi ruih nana hman chi an lei tur ven nana damdawi dawr (heng damdawi kawl pha chin) te chuan an dawrah damdawi leitute lang thei ngei tura CCTV vuah vek tur a nih thu order a lo siam tawh bawhzuiin, vawiin (28.8.2025) chhun khan Executive Magistrate John Lalramhluna Hnamte hoin FDA(H&FW Department) atangin Drugs Inspector leh Police Department-te tangkawp chuan joint inspection an nei. 

Sorkar thuchhuah tarlan danin, joint inspection-ah hian Civil Hospital, Aizawl chhehvel-a pharmacy 64 te endik an ni a, a tlangpuiin pharmacy-te hian District Magistrate thuchhuak hi an zawm tha hle. Amah erawhchu, heng Pharmacy zinga 7 te hian CCTV hi an la vuah(installed) lova, heng mite chungah hian a tul anga hma lak chhunzawm a ni dawn a ni.

Heng pharmacy endik zinga 31 te hian damdawi ruih nana hman theih chite leh antibiotic hralh fimkhur ngai bikte ziahna tur, Schedule H1 Register an vawng tha lo. Heng damdawi dawr zingah hian pharmacist thutchilh dawr 17 chauh an awm a, a dang zawngte hian pharmacist enpui lohin damdawi an enkawlin, an pe chhuak thin a ni tih hmuh a ni.

Pharmacy Act, 1948 leh Drugs Rules, 1945 te hian Pharmacist chu damdawi dawrah awm tlatin, a enpuina hnuaiah ngei damlo hnenah damdawi pekchhuah tur a ni, a ti. Pharmacist chuan damlo hnenah a țul anga counselling pe in, damdawi ei dan tur dik leh damlo hriat tur pawimawhte a hrilh hre thin tur a ni. 

Tin, pharmacy-te chuan ruih nana hman theih damdawi reng reng fimkhur taka an hralh a ngai a, an hralhna cash memo copy leh register an vawng tha tlat tur a ni. Damdawi dawr te hi a țul anga endik chhunzawm tur a ni ang.