Sports Minister-in JICA hotute a kawm
admin 19-Sep-2025 12:03 PMSports Minister Lalnghinglova Hmar chuan nimin (18.9.2025) khan Delhi-ah Japan International Cooperation Agency (JICA), India hotute a kawm a, Mizoram hmasawnna’na thawhho dan tur hrang hrang an sawiho zingah kumin December thlaa sports workshop buatsaih te, Mizoram coach-te kaihruai tura Japanese coach chah luh te, Japanese mipui nawlpuiin Mizoram leh Northeast India an hriatchian zawkna atana intlawhtawnte an rel.
Lalnghinglova Hmar chuan Mizoramin Olympic 2036 hmathlir a nei tih meeting-ah hian sawiin, he ‘vision’ hnuaia hmalak tawhna hrang hrangte a tarlang a, 'Sports discipline parukah Mizo coach-te zirtira kaihruaitu tur Japan Overseas Cooperation Volunteer (JOCV) hnenah dilna kan thehlut. Hei hi sawrkar laipuiin a approve tawh,' tiin Japanese coach-te an lo kal theih dan tura chak zawka hma lakpui turin JICA hotute chu a sawm nghal a ni.
Meeting-ah hian Mizoram Sawrkar leh JICA thawhho dan tur hrang hrang sawiho nghal a ni a - a bul ṭanna turin kumin December thla laihawlah Tokyo-a ‘Nippon Sports Science University’ te nen tanghoin Aizawl-ah ‘Coach Development Workshop’ buatsaih nise tiin rel a ni. Workshop-ah hian Nippon Sports Science University-a mithiamte’n zirtirna an pe ang.
A thawh khatnaah hian sports kaihhnawih bik thlurbing phawt niin, kum dangah chuan skill development leh topic dangahte pawh workshop hi buatsaih zel tum a ni ang.
Mizoramin sports discipline paruk – Track & Field, Wrestling, Judo, Weightlifting, Table Tennis leh Archery – a JOCV volunteer a dilna chu tihhlawhtlin ngei an tum tur thu JICA India hotute chuan an sawi.
An harsatna tawh pakhat Mizoram lut tura ‘Protected Area Permit’ ngai chungchanga zawhna awmte chu Home Department hotute nen sawiho ni se, tih a ni.
