Inter School Challenge 2025

Vawiin (19.9.2025) hian Serchhip Sub- Headquarters YMA Hall-ah MLA Trophy Inter School Challenge 2025 lawmman semna inkhawm buatsaih a ni a, Bialtu MLA Lalduhoma, Chief Minister, he challenge buatsaihna bultumtu chuan a hmanpui.

Chief Minister chuan, Inter School Challenge chu hmathlir thui tak nei chunga zirlai naupangte kaihhruaina, nakina national level exam leh an kal zelna tur atana lo buatsaih lawkna a nih thu sawiin, 'Mi tam tak ngaihdanah chuan sorkar hna hi a váng a, a tak takah chuan, a thiam tan chuan a vang lutuk lo. State sorkar hi chuan hna lak tur a ngah lo naa central sorkar erawh chuan a ngah hle,' a ti.

Tribal qouta pawh hi kan hnawhkhat zo thei lo zawk tih sawiin Lalduhoma chuan, 'Lehkhathiam hna nei lo kan tam phah ta a ni. Kan naupangte hi India rama kan tribal-pui hnam dangte aia lehkhathiam leh hriam zawk an nih phawt chuan hna hi vang an ti dawn lo. Chutiang mi an nih theih nan chuan an zirlai theuh an hriatchian a ngai a. Vawiina an zirlai hi competitive exam an hmachhawn hunah a la pawimawh vek dawn avangin he inelna hian kawngro a su hle turah kan ngai,' tiin zawhna kalphung pawh a tunlai ber ber ni zel se a that tur thu a sawi.

MLA Trophy Inter School Challenge 2025 hi primary school atanga college / DIET thlenga inelna niin, huang (category) pasarihah then an ni. Sikul 21 atangin naupang 172 an tel. Kuminah hian top ten chinte hnenah lawmman pek an ni.