GST inhrilhriatna hun buatsaih

Vawiin (18.9.2025) chhun khan Commissionerate of State Tax chuan September 22, 2025 atanga hman tur India ram puma GST rate tihdanglam leh a kaihhnawiha hriat turte inhrilhhriattna hun 'Refresher Workshop on GST' chu Taxation Auditorium-ah an buatsaih.

Commissioner of State Tax H.K. Lalhawngliana chuan thu sawiin, 'GST Council chuan September 3, 2025 khan bungrua leh tha (service) hrang hranga hralhna a GST rate thar hmanna tur a rel. GST rate thar hmanga India ramin tax reform a kalpui tur hi September  22, 2025 atanga hman tan tur niin GST rate hlawm li lai awm thin chu hlawm lian hnih (two slabs)-ah kalpui a ni tawh ang a, bungrua leh tha(service) hralhnaa GST rate chu 5% leh 18% a ni tlangpui tawh ang. Vaihlo leh a kaihhnawih thil ah 28% GST lak a ni ang a, lirthei thenkhatah 40% a ni tawh bawk dawn,' a ti.

GST rate tihdanglam tur hi a tlangpuiin a hniam zawnga a kal dawn avangin thil man hniam phah tur tam tak a awm dawntih sawiin Commissioner of State Tax chuan, 'Sawrkarin GST rate a tihhniam hian a tum lian tak pakhat chu mipui nawlpui banphak leh man tlawm zawka lei theih tura thil man siam that a ni. GST hniamna tur bungrua leh tha zawrhna lama sumdawngte chuan a zawrhna man an tihniam ngei tur a ni a, hemi kawngah hian sawrkar chu a thikthu a chhe hle dawn,' tiin September 22 hnu lamah chuan GST rate tih hniamna bungrua leh tha (service) zuar te zingah a man ti hniam lo report lut a awm chuan Anti Profiteering Measure hmanga action lak zel tur a nih thu a sawi.