Officer training mekte leh CM an inkawm

Nimin (17.9.2025) khan Chief Minister Lalduhoma chuan Mizoram Civil Services Combined Competitive Exam-a tling, Administrative Training Institute-a Combined Foundation Course kal mek, MCS, MFAS leh MIS officer-te CM Conference Hall-ah a kawm.

Chief Minister chuan officer-ten an hnuaia thawk, staff hniam zawkte hamthatna ngaihsak se a duh thu sawiin, staff hniam lama indaih lohna nasa lutuk tihziaawm tul an tih thute pawh a lo hrilh a, 'Sorkar hnathawk chuan, mipuiten ram rorelna an pekte apiang hi tha tak leh rinawm takin thlawp ila, hmasawnna hnathawh a chakin a kal tluang thin. Chutihrualin, tuten emaw ruling mi leh sa an nihna changchawia thil dik lo tihtir che u an tum a nih chuan lo hlau suh u. Kan hum ang che u,' tiin a chah.

Lalduhoma chuan officer tharte hi lawmpuina hlanin an kal zelna turah duhsakna a hlan a, 'In hna hi Pathianin in rawngbawlna tura a pek che u a ni a. Phur tak leh rinawm takin in thawk dawn nia. Service hrang hrangte a huhova training in nei hi lawmawm ka ti khawp mai. Hei hian in zingah innelna leh inhriatthiamna thuk tak a siam dawn a. Ramin a hlawkpui dawn a ni. Reilote chhungin Mizoramah service rivalry a nasa lutuk tih ka hmu a, he inelna tha lo hi tihbo kan duh a, nangni hi chuan rawn chhawmlut ve suh u,' tiim tunah hian an rilru chak vanglaite a la nih avangin UPSC lam pawh la exam zel thei se a duhthu a hrilh.