Min dah nghet thei - AMCECC

AMCECC Lunglei Hqrs. member-te chu vawiin (18.9.2025) hian Mizoram hmun dang rualin sorkar thutlukna ngaichangin an pungkhawm a, an president Lalmuanpuia chuan India constitution kalh loa lak an nih thu a sawi.

Lalmuanpuia chuan Indian constitution kalh loa an hnaah lak an nih thu sawiin, 'A dah nghehna pawh hi Constitution article 309 vek hian min dah nghet thei a, dan loa indahnghehtir hi kan tum leh sorkar kan karna a ni reng reng lo. Kan gazette min siam sak hlim hlawt a hmang awmten hmang hmasa lova MR leh co-terminus a recruit ten an han hmang hmasa daih mai hi a mak a ni,' a ti.

A tling ngeia lak te, educational qualification etc. a phut ang ngeia lak leh tlingte an nih thu sawiin AMCECC Lunglei Hqrs. President chuan, 'Tling loa lak anga min tarlang fo mai hi kan nihna ni miah lo intihmualphona a ni a, tling loa lakte chu a latu hnenah action an la ngam tur a ni,' tiin CSS Reservation chu thangtharte tan nek chepna a nih loh thu an sawi.

Anni pawhin hmana an beih laiin ngatinge an nghehna tur hi ngaihtuah sak an nih lo tia zawhna siamin Lalmuanpuia chuan, 'Tunah hian hei hi ti se, thangtharte pawhin an enjoy chho zel thei zawk ang. Service kum 10 nei tling tawhte, senior tak tak lo tihnghet hi thangthar hmakhua hnawh pinna a ni lo, mitin hmakhua a ni zawk,' a ti.

AMCECC Lunglei Hqrs. President chuan check list zawm kim turin  DPC Meeting minutes etc. neihte a ngai tih sawiin, 'Heng neih kim hi an recruit-te mawh a ni lo, an phut mek a ni. DPC mumal tak nei a hna lak hi sorkar tih tur a ni, a hun laiin DP&AR hian a tih tur tam tak a ti lo zawk a ni,' tiin DP&AR in mipui lakah dan a interpret dik lo zawk thu a sawi.