K Hminga debut album tlangzarh a ni ta

K Hminga'n a rimawi zinkawnga a album hmasa ber 'Ka Ngaih, Zawngho' tih chu a duh apiang tana ngaihthlak theih turin tlangzarh a ni ta. Tlangzarh zan la la hian album track download an tam avangin Darbu traffic a ti jam hial!

December 8, 2023 zan khan sawm bik mi eng emaw zat te hmaah K Hminga debut album 'Ka Ngaih, Zawngho' tih chu tlangzarh a ni. Tlangzarhtu hi K Hminga pa, VL Rosiama a ni. A ni hi tuna thangthar tam zawkin an rimawi an tem ve phak loh, tun hmaa live band lar leh Zo rimawi chhem alh reng thin tu, Tornado band-a guitarist thin kha a ni.

'Ka Ngaih, Zawngho' album tlangzarh inkhawmah hian he album-a Technical Director ni a, album an recrod-na Kings & Prophets Studio neitu ni bawk Toi Intoate chuan album thlirlawkna a nei a. Album neitu K Hminga pawhin a debut album buatsaih a nih dan te, album buatsaihna kawnga harsatna an tawh dan te, a album-a hla te a lo pian dan te leh album siam a hlutzia te a sawiin, album-a hla te hi kalkhawmte chuan an ngaithla nghal bawk.

Darbu traffic ti jam nghal

K Hminga album hi tlangzarh a nih zan la la hian, lei theih tura chhawpchhuahna digital platform Darbu kaltlanga leitu pawh an thahnem nghalin, a lun nghal hle. Hei vang hian pho chhuah a nih atanga hun reiloteah Darbu download traffic a ti jam nghal hial a. Hriat theih chinah, hun reilote chhungin album download-na atangin Rs 55,000 hmuh chhuah nghal a ni.

Album-ah puitu an hrawl

Blues & Khuz album-ah hian hla 10 a awm. A album-a hlate musician tha tak tak - Albert Peka (Keyboard), MikeJi (Drums), Sangkima (Bass) te'n an rem pui a. Hei vang hian he album-a track te hi a mawi lo thei lo va. A rimawi lam chauh pawh ni lo vin, backing vocals lam pawh an hrawl hlawm hle - Chali, Sangtei Khuptong, Jaui, Hmachhuana, Valentino Khiangte, Aengi Royte, Rosalyn, Albert Peka leh Lalremruata Fanai te an tel nawk mai. 

Recoding team

K Hminga hian a debut album-ah hi Kings & Prophets Studio-ah recoding uluk taka tih a ni. He album-a Technical Director pawh United States (US)-a music a zir hrep tawh hnua Mizorama recodring studio hlun leh hmingthang tak ni ta, King & Prophets Studio dintu Toia Intoate ngat a ni. A ni bakah hian engineering lamah Albert Peka, Toi Intoate, Dawngtea, Ephraim Malsawma te an la ni cheu a. Mixing hi K Hminga kutchhuak niin, Mastering hi Toi Intoate kuthnu a ni bawk.

Album tlangzarhnaah Chief Minister hlui te nupa

K Hminga hian album tlangzarhnaah hian Mizo mi lar thahnem tak hmuh tur an awm. Chu'ng zinga langsar ber tia sawi theih tur chu, Mizoram chief minister hlui, Lal Thanhawla leh a nupui, Riliani te an ni. Anni nupa hian hun tawp thlengin an awm a, an fakawm khawp mai. 

Anni bakah hian Mizo musician atanga TV presenter thlengin hmuh tur an awm a. Blues & Khuz album tlangzarhnaah hian a changtunu pawhin tha takin a tawiawm ve zan bawk!

A album-a hla pahnih khat chu

Blues & Khuz debut album-a tracklist en vang vang hian, title thenkhat chuan mak tih pawh a hlawh mai thei. A bik takin, a album title 'Ka Ngaih, Zawngho' tih hi.

'Ka Ngaih, Zawngho' title bik hi, K Hminga'n a sawi dan chuan, a tawngkam hi mawi loin lang thei viau mah se, Mizo khawtlang nunah hian 'Zawnga' tia inkoh ngam chin tawh hi chu inthiantha tak, inlamhnai tak an ni tawh a. Ngamtlak tak takte lakah lo chuan chutianga inkoh mai mai ngam chi pawh a ni lo - tih lam hawi daiha feel erawh a ngai thung.

A album-a backing vocals chauh ni lo, a feature awmchhun Sangtei Khuptong nena an sak dun, 'Hmangaihna Kawrawng' tih hi, a sakpuinu Sangtei Khuptong nena an phuah dun hi a ni a. He hla hi, nula tlangval inhmangaih a, inngaihzawngah chuan, a tu ve ve zawk emawin, a hmangaih nasa zawktu an awm. Chumi dinhmun atanga thlirin he hla hi phuah a ni.

'Hmangaihna Kawrawng' tih hi Sangtei Khuptong nena an phuah, Sangtei Khuptong room-a an phuah dun a ni nghe nghe.

'Ri Lova Mawi Rimawi' tih hla lo pian chhuah dan hi a nuihzathlak angreng! Kha, kan la hre vek awm e - Kelkang hun lai kha! He'ng hun lai hian K Hminga pawh chhungte thuawihna avangin a Kelkang ve zan a, a inbin pawh a inbin! Mahse, Kelkang lam hawi lo deuhin hla a rawn pian phah thung.

Kelkang kalkawngah a ngaihtuahna, a suangtuahah 'hlum ei' tih vel ai mahin, khuanu'n leilunga a din, mihringte'n an mamawh leh hman tangkai thing leh mau lam daih a lang. Mizoram leilung dan kalhmang zia (nature) mawi tak a hmuhin, he'ng nature te hian rimawi pe chhuak lo mah se, ri lova rimawi pe chhuaktu tiin, he hla hi a rawn phuah chhuak ta a ni.

Album chungchanga Bengvarna review tawi

K Hminga kan hria, a rimawi tihchhuah hmasakte pawh kan ngaithla fo tawh bawk. Mahse, a rimawi hmasa ang rimawi kha tuna a debut album-ah hian kan beisei vek a nih chuan, kan tisual ang. A album ngaihthlak chhinna atangin, Bengvarna chuan 'Ka Ngaih, Zawngho' album-ah hian K Hminga thar kan hmu!

K Hminga thar, aw, ni e! A rimawi lo tihchhuah tawh, kan ngaihthlak tawh ho - Zan Zai Ri, Tunge Inthlei Thei, Ka Hringnun Diary, Hmangaih Hmasa Ber leh a hla tam zawkah hian Country leh folk kawp rawngkai hi bengah a cham lo thei lo. Tun tuma a debut album-ah pawh hian chutiang rimawi chu ngaihthlak tur awmin, Blues & Khuz ti Blues & Khuz tu hi a awm lo thei lo a, chutiang chu a tam rualin, a tam lutuk lo. A album-a track thenkhatah hian a mainstream lutuk lo va. Mizo rilrem zawng folk a pawl a. A tawi zawngin, track tam zawkah hian a rimawi kalphung, technical leh musical deuhin a rawn dang daih. Hei hi a chhan niawma lang thei zingah, band chemistry avangin thil thar tam tak a rawn chhuak a tih theih awm e.

Blues & Khuz hi mi tam zawkah bengah chuan a rimawi hi leikapui lam a ri tamin a hriat mai theih, tuna a debut album ah hian leikapui deuhin a leikapui miah lo a. Mi tam zawkin an hmehbel fo, John Mayer anga rock, pop leh blues te mawi taka remkhawm; mahse, John Mayer nena hmehbel tak tak dawna hrang leh hlak si ang hi a ni reuh va!