Mizo hnam hi MNF dinchhan - Dr R Lalthangliana
admin 23-Jun-2025 03:23 PMVawiin, 23.06.2025 (Thawhtanni) chawhma dar 11 khan MNF chuan an office-ah political session an hmang a, thusawitu Dr. R. Lalthangliana, MNF Sr. Vice President chuan, 'MNF hi ram leh hnam hmangaih tute luankhawmna party a ni,' a ti.
Dr R Lalthangliana chuan Mizo hnam hi MNF dinchhan a nih thu sawiin, 'Hnam lungphum nghet tak chunga ding, ram leh hnam hmangaihtute luankhawmna chu MNF hi a ni. Zofate inpui zalenna meichher chhitu kan ni. He meichher hi a mit tur a ni loa, thangthar lo chhuak zel turten kan chhawmnun zel a pawimawh em em,' tiin Mizo hnam hmangaih tak takte tan MNF-ah hmun a awm reng thu a sawi.
MNF Sr. Vice President chuan, zalenna sual a nih hnuah hnamdang ngaihsanna thuk taka lo awm tawh chu thlak danglam dawrh a nih thu sawiin, 'Mizote khawvel hriata hnam zahawma min phochhuaktu, ram leh hnam anga kan dinchhuahna atana bultantu, Mizo Nationalism meichher min chhitsaktu kan hruaitute leh nunna hial hlantute zahna chibai kan buk thar leh. Inremna thuthlungin a tha zawnga nghawng chhuah a neih zel hi MNF in a ngaih pawimawh te zinga mi a ni. Peace accord angin non tribal-ten Mizoramah ram an nei thei loa, mahse ram nei an tam tih sawi a awm fo hi enfiah a tul hle. Ram leh hnam tan theihtawp chhuah turin i bei zel ang u,' a ti.
