Ram pass chhuhsakah RO puh

Pangkhua Village Council, Young Lai Association leh Lai Women Association chuan thuchhuah intawm siamin, 'Thingsai-Bualpui-Saisih-Pangkhua-Sangau (TBSPS) road, 7.800 km - 29.180 km (Pangkhua ram chhung bik) laih turah he kawng aligment-in a paltlang chhungah khawtlang neitu VC leh NGOs te hriatpuina tel lova Pu LH.Ramdingliana, RO, Revenue LADC Sangau-in compensation lak beisei avanga mimal ram pass chhuhsaka ram a lak avangin Pangkhua khawtlang hruaitute, Village Council & All NGOs meeting chuan a hnuai mi ang hian thuchhuah a siam a ni,' a ti.

Pangkhua thuchhuah

1. LADC, Land Revenue & Settlement Department, Sangau-a RO te leh an staff-ten TBSPS road laih tura aligment-in a paltlang chhungah a ram neitu VC-te hriatpuina leh rem tihna tel loa compensation beisei avanga ram pass tam tham tak an insiam hi tha lo kan tiin cancel ni rawh se.

2. Pangkhua mipuite zingah he alignment-in a paltlang chhunga ram nei mi thenkhatte pass renew tura tih niin renew tura ram neituten pawisa pe a office an dawr laiin chhuanlam siama renew sak duh lovin pawisa pawh pekkir an ni. Hei hi remchang a lain pass thi tawh anga cancel sakin mimal ram chhungah pass thar a siam a ni tih ama tawngta ngei atanga kan hriat avangin pawi kan ti a, ram neitu dik tak hnenah ram hi pek let vek ni rawh se.

3. LH.Ramdingliana, RO hian pass renew leh PS forwarding pawh ti duh loa mipuite min hrekbet reng hi na kan ti a, hetiang hi thleng tawh lo se, kan ti.

4. TBSPS Road laih tur hi aligment avanga rei tak a thuanawp tawh lai leh BRO-ten compensation a tam an hlauhthawn avanga kum tam tak harsatna kan tawh laia Pangkhua khua leh tui ni lo, Revenue Department-a thawkte leh an laina hnaite ram pek an ni hi pawi kan tiin ram hmasawnna tih thuanawp tumna leh ram leh hnam rawknaah kan ngai

6. Compensation beisei avanga kum 2023-2025 chhunga Revenue Department-ten ram pass an siam thar zawng zawng te hi cancel ni rawh se.

Pangkhua VC leh NGO-te chuan a chunga an thilphutte hi tihhlawhtlin a nih loha mimal ram cancel anih loa mimal ram cancel sakten an ram ngai ang taka an neih let leh hma chuan ni 25.06.2025 - 03.07.2025 chhunga preliminary survey, Deputy Commissioner, Lawngtlai atanga neih tur hi an rem ti lo a ni tih ram mipuite hriatah puangin, he kawng hi a hma lama laih a nih theihna tur leh kan thil phutte a hlawhtlin theih nana hma laksak turin thuneitute an ngen nghal a ni.