PWD-in Chief Minister an entir

Vawiin (24.6.2025) chawhma khan Chief Minister Lalduhoma hmaah PWD Minister Vanlalhlana leh PWD thuneituten Aizawl khawpui chhung kawngpui pengthuam thenkhat siam dan tura rawtna an neihte an thlen.

Vanlalhlana chuan, sawrkar hmasa lamah khan Aizawl pengthuam pawimawh te siam tumna a lo awm tawh thin tih sawiin, 'Nimahsela, a man a sangin a lian tham deuh thin. Vawiina kan rawn ruahman hi chu sum seng tam lutuk lo va pengthuam pawimawh pathum siam that tumna a ni,' tiin thuhma a sawi a, chu mi hnuah an ruahmannate hi enho a ni.

Hmun pathum Bawngkawn pengthuamah hmun hnih leh Vaivakawn pengthuamte siam dan tur an rawtnate CM hi an entir. An ruahmanaah chuan State Guest House thlanga Chaltlang Road hnuaiah hian Ramhlun main road leh Ramhlun lower road-te tunnel siam a, lei hnuaia inzawm tir a, Bawngkawn Police Station bulah National Highway va zawmtir a ni.

Ramhlun lam atanga NH lama kal duhte tan leh NH atanga Ramhlun main road leh lower road-a kal tur te tan tuna traffic point va thleng kher lo va kaltir theih kha a tum a ni a, lirthei liante erawh chu an kal thei lo ang. He project hi cheng vbc. 25 a thawh theih nia ngaih a ni.

An ruahmanna dang leh chu, Bawngkawn Hrangbana Filling Station thlang, tripper dinna atanga (Viaduct) leihlawn, Brigade Veng lama va dawhkai a ni. Serchhip Bypass road, Sailiamkawn bula an dawh leihlawn ang chiah khi he hmunah hian metre 49 vela sang, metre 150 a sei a dawh theih niin an ngai. Lei dawh awlsam leh man tlawm a ni. Brigade veng lamah chuan Greenwood Hospital bul peng thuam velah a chhuak phei ang. He hna hi cheng vbc. 30 vela thawh theih tura ngaih a ni.

Bawngkawn pengthuam hi Aizawl khawpui chhunga pengthuam lun ber a ni a. Chawhrualin nitin lirthei singnga (50000) chuangin an paltlang thin.

A ruahman pathumna chu Vaivakawn pengthuam siam a ni. Vaivakawn junction ruahmanna hi tuna Vaivakawn Bazar sak mai tawh tur nen hian kal kawptir a ngai dawn. Cultural Centre bul hnai atanga YMA ground sir deuh chunga leihlawn, Bazar atana hman theih nghal tur dawh phei a, Vaivakawn Bazar-a va innghahtir a ni. Cheng vbc. 40  vela sak theih beisei a ni. Vaivakawn pengthuam hi chawhrualin nitin lirthei singthum (30000) chuangin an paltlang thin.

Heng ruahmannate hi duan ni mah se, eng sum atangin nge thawh a nih ang tih kha la dap leh tur a ni. Vawiina meeting-ah hian a thawhna tur sum hnar sawi a ni rih lo va, a sum dap dan tur erawh chu a thuphungin an sawiho a ni.