Hnatlangin kawng an siam

Chawngtlai, Khawzawl District-a sapthei chingtute chuan nimin (23.6.2025) khan an sapthei hmun kalkawng an siam.

Chawngtlai khuaah hian Sapthei ching chhungkaw 135 vel an awm a, an sapthei hmun hi a hla ber kilometre 3 vel niin, furah kawng a chhiat thin avangin a phurh chhuahna kawngah harsatna an tawk thin. Kuminah pawh kawng hi lirthei zawh a harsat leh avangin nimin khan hnatlangin kawng chhe zual lai an siam a ni.

Tun dinhmunah sapthei hi Chawngtlai khuain an sum lak luhna hnar lian ber pakhat a ni tawh. Kumin hian qtls. 800 vel an hralh tawh a, an sapthei thar hi MIFCO bakah commision-te hnenah an hralh thin a ni.