Rakzu thahnem tak an man

Serchhip Police-te chuan nimin (24.62025) khan Chhingchhip khuaah rakzu litre 640 zet manin a neitu nia hriat mi pakhat leh zu phurhna atana hman motor leh a khalhtu an man.

Lenkawl Editor Zonuna Kawlni hnen atanga Bengvarna thudawn danin, nimin khan Chhingchhip khuaah rakzu te hi man a ni. Rakzu te hi satha ip pakhatah litre 40 zela dahin, satha Ip 16-a dah a ni a, a vaiin litre 640 a ni.

Zu neitu nia hriat Lalnunpari, Rangvamual nia insawi pawh man nghal a nih bakah heng zu phurhna atana hman bolero pik-up leh a khalhtu Vanlalliana, Saron Veng, Aizawl nia insawite pawh man an ni.

Zu neitu hian an zu phurhte hi Rangvamual atanga lak a nih thu sawiin, Siaha-a dah turin niin a sawi bawk. Heng Rakzu leh a kaihhnawiha mante hi Serchhip Police te chuan nimin vek khan Serchhip-ah rawn lain MLP Act hnuaiah thubuai an siam sak.

Vawiin hian Serchhip District Court-ah hruai an ni ang. Heng an zu man te hi tualchhunga hralhna atangin Rs. 3,20,000 man vel nia chhut a ni.