Damdawi inah politics inrawlh duh lo

Kolasib East Block Mizo National Youth Front (MNYF) chuan nimin (24.6.2025) khan thuchhuah siamin, damdawi inah politics inrawlh lo se an duhthu an tarlang.

MNYF chuan, 'Kan hriat theuh angin Kolasib Damdawi In chu khum za awmna tura sak that mek a nih avangin dam loten khum kan inchan lo nasa hle. Mipuite harsatna tawh mek hriain District Hospital, Kolasib-a thawktute pawhin theihtawp chhuahin hma an la mek a ni. Hetih lai hian ruling party mi leh sa nih avanga induhsak a, damdawi in khum chungchanga MLA leh Minister-te hial an inrawlh hi pawi kan tiin a lungchhiatthlak kan ti. Ruling party mi leh sa induhsakna awm chi-ah chuan kan rama sawrkarna chelh mektu ZPM Party-te hi an induhsak a nih chuan mipuite pawhin hriatthiam chin kan nei vek,' an ti.

Damdawi in khum lehzela party mi leh sa induhsakna a awm thin mak an tih thu tarlangin MNYF chuan, 'Hriatthiam har kan ti. Thawktute ruahmanna tibuai zawnga party mite induhsakna awm thin hi tihtawp ni se kan duh takzet a ni. District Hospital building sak mek avanga khum kan indaih lohna leh thawktute buainate hi hrethiam a, MLA leh Minister-te pawh dam lo admit chungchanga inrawlh tawh lo tur leh, party mite pawhin kan MLA leh Minister-te hetiang thila inrawlh tura nawr tawh lo turin kan ngen,' tiin thawktute ruahmanna leh hmalakna ring ngam tur leh thuawih taka zawm ve mai turin pawhin an ngen.