MUHCS kalpui tum dan fuh ti lo

MPCC Treasurer Dr Lalmalsawma Nghaka chuan vawiin (25.6.2025) chhun khan Aizawl Press Club-ah press conference koin ZPM Sawrkarin Mizoram Universal Healthcare Scheme (MUHCS) kalpui a tum dan fuh lo a tih thu sawiin, en tha turin a phut.

Dr Lalmalsawma chuan MUHCS chu scheme tha tak mai, mi harsa zawkte tan phei chuan a aia tha a awm chuang lo ang tih tur a nih thu sawiin, 'Amaherawhchu, sawrkar hian hetiang scheme tha tak kalpui a tum danah hi a fuh lo hle in kan hria a ni. MUHCS hi tunah hian sawrkar hospital-ah leh private hospital thenkhatah chauh kalpui a ni. Mizorama damdawi in lian pahnih ZMC&H leh Civil Hospital te hian min dawl zawh dawn loh avangin private hospital-te tel lo chuan he scheme tha tak hi a hlawhtling dawn lo tih a chiang,' a ti.

MPCC Treasurer chuan private hospital neitute thuchhuah leh TV vela an kawmna atangin sawrkar hian an duh ang barhluih tumin hma a la nia a lan thu sawiin, 'Hei hi a serious hle. Private hospital neitute vauna tawngkamte pawh sawrkar lam atangin a chhuak a ni awm a, hei hi a pawi hle. Sawrkar hian he MUHCS hlawhtlin nan hian private hospital-te a mamawh avangin inbiakna neih puiin a rate leh bill pek dan tur bakah security sawrkarin a pek theih tur thlengin an sawiho in an inrem tur a nih laiin ZPM sawrkar hian an duh anga engkim kalpui in zawm turin a nawr lui niin a lang a, hei hi thil nihphung tur a ni lo,' tiin private hospital-te tan pawh pawm theih chi nia a lan loh thu a sawi.

MUHCS-ah hian tun thlengin mi 5000 vel chauh an la in register tih sawiin Dr Lalmalsawma chuan, 'Mipui lam pawhin rinhlelhna an la nei lian hle tih a lang a, a bikin sawrkar hnathawk harsatna tawk pawh an awm nual tawh a ni. Sawrkar damdawi in lian ZMC leh Civil Hospital ah khum chan a har bawk si. Emergency tak taka inzai ngai te, nau vei te an awm a, Private Hospital an pan loh theih loh hun a lo awm a, buaina a thleng chho mek a ni. Heng thil lo thlen chhan chu sawrkar ruahmanna fel loh vang leh kalphung hriat loh vang a ni a, hei hi kalphung thar a nih chuan mipui in an tuar nasa dawn a, an hriselna phei chuan a tuar hle dawn a ni,' a ti.

MPCC Treasurer chuan sawrkarin phai lam hospital thenkhat inremna siampuiin reimburse theih turin an kalpui nite a sawi a nih thu sawiin, 'Hengte hi a serious hle. Mizorama private hospital-te hmelma en ti tiha an en laia phai lam hospital-te duhsak zawk anga an che te hi sawrkar hian mipui tawrhna lo thleng thei thil hi engahmah a ngai lo a ang hle. Phai lama inenkawlna senso kha bill leh thei pawh nise hotel thlen man leh ei leh in, veivahna te thlengin a hautak em em,' tiin ngaihtuah chian a tul thu a sawi.