Chief Minister-in meeting a ko

Vawiin (26.6.2025) chhun khan Ministry of DoNER-in India hmarchhak hmasawnna tura Economic Corridor hmathlir duang tura a din High Level Task Force on North East Economic Corridor-te chu an convener Lalduhoma, Chief Minister hoin online-in an meeting.

Sorkar thuchhuah tarlan danin, meeting kaihruaitu Lalduhoma chuan meeting-a tel te chungah lawmthu sawiin, a ngaih pawimawh thilte a sawi hmasa a ni.

Chief Minister chuan hmarchhak infrastructure tihchangtlun tulzia tarlangin, 'Mizoram road density hi India ram average aiin a hniam zawk hle a, infrastructure dangah pawh kan la hnufum hle. Infrastructure-te kan tihchangtlun hian chhak lama Asian ramte nena kan inkalpawhna kan titha a ni nghal zel a, thawh tur a tam hle a ni,' a ti.

Hmarchhak bialte tana hmathlir fel tak neia hmalakpuitu DoNER Minister Jyotiraditya Scindia chungah lawmthu a sawi.

Planning Secretary Lalmalsawma Pachuau chuan meeting hmasaa sawihona leh member state-te atanga rawtna lo lutte behchhan report a pe a, chu mi hnuah sawihona an nei zui a ni.

DoNER Minister, Megahalaya CM Conrad Sangma, Assam Minister Chandra Mohan, Manipur CS PK Singh, MoRTH Secretary V Umashankar leh Department for Promotion of Industry & Internal Trade aiawhten thu an sawi.

An sawihonate hi state tinten an thlirho leh ang a, meeting an la nei zui leh ang.

He Task Force hi Ministry of DoNER-in India hmar chhak hmasawnna ruhrel pawimawh thawh tur (objectives), short term, medium term leh long term ruahmanna neia rawtna siam tura din a ni.