Ruang phawrh theih a la ni lo

Ni 21.8.2023 zan thi Sailomawia (72), BSUP Lawipuia cheng thihna chungchanga tualthattu finfiahna a nih theihna atana pawimawh ruang phawrh theih a la ni lo.

An hnuchhuina atana pawimawh a nih avangin police-te chuan Sailomawia ruang phawrh thuneitute(magistrate) hnenah an dil a, he thuziahlai thleng hian ruang phawrh remtihna an la dawng lo. Ruang phawrha postmortem a nih hma chuan an hnuchhui a chak thei lo a, ruang phawrh phalna an hmuh hunah ruang hi phawrh a, postmortem a ni ang.

Tarlan tawh angin Sailomawia thattu ni a hriat a fanu Lalrengpuii leh a tupa Benjamina-te chu police-in an man a, nimin (6.9.2023) khan Central Jail-ah dah an ni.

Police atanga Bengvarna thudawn danin, Sailomawia hi ni 21.8.2023 zan dar 11:30 velah a thi a, a thih danah ngaihthat lohna awm loin vui dan pangngaia vui a ni. Mah se, tunhnaiah Lalrengpuii leh Benjamina-te inhauhna atangin Sailomawia hi thihdan pangngaiin a thil lo nia hriat a ni a, a mawhphurhtua ngaih an pahnih hian man an ni.

Lalrengpuii hi a pa Sailomawia nena cheng dun an ni a, Benjamin-a chu Muallungthu niin, a pute hi a tlawhfo thin a ni. Police hma-a an sawi dan chuan, Lalrengpuii hian a pan a hauh reng thin avangin that mai turin Benjamin-a hi thlem a ni. Benjamin-a hian hei zawmin ni 21.8.2023 zan khan Sailomawia mu tawh chu a that a ni. Lalrengpuii hi zu in thin niin, Benjamin-a pawhin ruihtheih thil a ti thin.

Lalrengpuii leh a thenawmpa chu tunhnai khan an inhau a, Benjamin-a hian a lo hau chu Lalrengpuii hian Sailomawia thah a nih chungchang hi a sawi chhuak a ni. Police hnena hemi chungchang thlen a nih hnuah an pahnih hian ni 4.9.2023 zan khan man an ni.

Police-te chuan Lalrengpuii leh Benjamin-a thusawi hi a dik reng em tih an chhuizui mek a, chumi atana pawimawh tak chu ruang phawrh a ni.