BD Chakma a ding leh dawn?
admin 01-Oct-2023 04:13 PMTuichawng Bialtu MLA Dr BD Chakma chuan eng inthlan mah a chuh tawh dawn loh thu puang tawh mah se, kumin MLA inthlan lo awm turah a in candidate leh maithei.
Dr BD Chakma hian ni 7.7.2023 khan active politics a chawlhsan tawh dawn thu Chawngtea BJP pisaah a puang a, 'Kum 2014 khan Mizoram minister of state ka nih laiin kum 50 a tlin chuan politics a chawlhsan tur thu ka puang tawh. June 2023 khan kum 50 ka tling ta a, chuvangin, ka sawi lâwk tawh angin politics ka chawlhsan tawh dawn. Eng inthlan mah ka chuh tawh dawn lo, a ti.
Dr BD Chakma chuan, CADC BJP President nihna pawh a aiawh tura ruat hnenah August 2023 chhungin a hlan tur thu sawiin, 'Doctor hna hun tam zawka thawh ka duh tawh bakah, zirna lamah hma kan sawn a, quality education kan neih theihna atan theihtawp ka chhuah dawn,' tiin ṭhangthar zawkte tan politics-ah hmun a ken thu a sawi.
Hetihlai hian Bengvarna nen an inbiaknaah an hruaitute'n ding leh tura an ngen thu Dr BD Chakma chuan sawiin, 'Ka dinna ngai renga ka la din thuin ka chhang thin. Chutihrual erawh chuan kan hruaitute'n min ngen lui tlat a nih chuan hnial theih loh hun pawh ka nei maithei,' a ti.
Dr BD Chakma sûlhnu
* Kum 2008-ah Congress ticket-in CADC MDC atan thlan a ni a, executive member a ni.
* Kum 2013-ah MDC atan Congress ticket vêkin thlan tlin leh a ni a, chief executive member a ni.
* Kum 2013-ah vêk Congress ticket-in Tuichawng bialah MLA atan thlan tlin a ni.
* Mizoram sorkarah hun eng emaw chen minister of state a ni a, a hnuah MLA pangngaiin a awm.
* Kum 2018-ah Tuichawng bialah BJP ticket-in MLA atan thlan tlin leh a ni.
