Sum pawh luh an nei lo - Lalchhandama Ralte

]MNF chuan vawiin (16.6.2025) chhun khan an office-ah chhung inkhawm an hmang a, thusawitu MNF Vice President Lalchhandama Ralte chuan ZPM Sorkar chu sum pawh luh nei loah puhin, MPCC President Lal Thanzara'n amah a beihna a chhanglet.

Lalchhandama Ralte chuan kum khat leh a chanve an kal hnuah, tha bik, fel bik, financial management thiam bik nia insawite hian Delhi tlangah project um chhuah hlawhtling an neih hriat a la ni lo tih sawiin, 'Share of taxes, puk chawp, CSS pangngai lo kal bak manage tur an la nei lo. SASCI sum an ti-lapse a, heti chungin Finance Minister-in balance cheng vbc sang chuang nei anga a sawite hi a mak,' a ti.

Sum pawh luh an nei lo a, sum che vel tur a awm lo tiin MNF Vice President chuan, 'Sorkar kum liamtaah khan fiscal deficit a nasa hle. Tunah hian cheng vbc 3000 vel an puk tawh niin an sawi. Sum indaih lohna hi kum 2024-25 Budget (RE) kan en chuan GSDP atangin fiscal deficit (puk tel lova sum indaih lohna) chu 7.64% chuang a ni a. Hei hi Covid-19 hnu lamah a sang hle. FC 15-na leh The Mizoram FRBM (Amendment) Act, 2020 chuan Fiscal Deficit % of GSDP hi ‘3% target’ tur a tih laiin, Sorkar kum kal meka fiscal deficit target an dah pawh 4.58% a ni,' tiin GST collection a chhiat chhan leh fiscal deficit a san viau chhan chu financial management an thiam loh vang a nih loh chuan a chhan dang puh tur a van thu a sawi.

Lalchhandama Ralte chuan tunhnaiah MPCC President-in ‘Opposition Leader hi an sorkar lai – Education Minister a nih lai khan sikul tihchangtlunna tur tam a lokal a. Heti zat hian thawk ula, heti zat hi ka chang ang, tiin thingtlang MNF hotute a hrilh a. Hei vang hian sikul tihchangtlunna tur angin a thawh theih loh a, room tam tak sak loh a awm a ni,’ tia a sawi thu sawiin, 'Thudik a ni loa, beih tham dinhmuna Pathianin min dintir avangin ka lawm,' a ti.

Leader of Opposition chuan politics-ah chuan ram tana hmasawnna tur kan sawi dawn emaw ka tih laiin, Congress President-in UT hunlai politics zia hmangin a beichiam nia sawiin, 'A puitling lo hle. An zia hi hetiang a la nih reng chuan an kaihhruaite pawh an khawngaihthlak hle. Amah pawh hi ka khawngaih tak zet a ni,' tiin puh a nihna hi thudik ni se ram rawngbawl zel tlak a ni lo tih a pawm tur thu a sawi.