Leiba thangah Mizoram a tang mek - MPCC

Mizoram Pradesh Congress Committee (MPCC) Media-te chuan vawiin (17.11.2022) chhun dar 12:30 khan Aizawl Press Club-ah press conference an nei a, MNF Sorkar hnuaiah Mizoram leiba thangah a tang mek niin an sawi.

Press conference kaihruaitu MPCC Media Chairman Dr Lallianchhunga chuan sum leh pai enkawlna lama MNF Sorkar a talbuai em avangin Mizoramin harsatna nasa tak a tawk mek nia sawiin, Congress Sorkar tlak hnuah Mizoram leiba cheng vbc. 6,000 dawnin a pung hman. Hei hi Mizoram state a nih atanga tuna MNF Sorkar leh hma kum 32 chhunga Mizoram leiba nen a inzat tep a ni. Kum 32 chhunga Mizoram Sorkar leiba tlingkhawm chu cheng vaibelchhe 7,315 a ni, a ti.

Dr Lallianchhunga chuan MNF Sorkar chu puk tur a hriat apiang a puk hmiah hmiahah puhin, Sorkar hnathawk hlawh pek dawn apiangin puk tur a zawng a ni ber. Sorkar lo awm leh tur tan pawha rulh huphurhawm tak, chet ti harsa tham leiba an hnuchhiah ngei dawn a ni, tiin tun dinhmuna Mizoramin a mamawh ber chu ram hruaitu, sum leh pai enkawl thiam, eirukna laka fihlum, enchhin pawh ngai lo, mi rintlak leh ram hmasawnna duh tak taktu a nih thu a sawi.

MPCC Media tarlan danin, tun dinhmunah chuan sorkar hnathawkten a hun takah hlawh an la thei loa, GP Fund pawh an la thei hek lo. Sorkar hnathawk pension-te pawhin chhuahpui nghal tur pawisa nei loin, health care hnuaiah sum tam tak ba a awm bakah, contractor-te pawhin a hun takah bill an la thei lo a ni.

#Bengvarna News