Scooty-in mi pahnih suhlum
admin 05-Aug-2024 11:06 AM
Nizan (4.8.2024) dar 6:45 vel khan Lalliansanga (20), Sairang Dawr Veng chuan Sihhmuiah scooty-in mi pahnih a suhlum.
Sihhmui YMA hruaitute hnen atanga Bengvarna thudawn danin, scooty-in a suthlumte hi Lalchhuanawma (45), Nghalchawm leh Thanngaia (79), Myanmar atanga Aizawla rawn raltlan, Sihhmuia raltlan ve tho a chhungte tlawha kal a ni. Noel Lalhmingi (kum 45 vel) pawh scooty hian suin hliam a tuar a, damdawi inah an enkawl mek.
Scooty hian Thanngaia leh Noel-ite inkhawm kal tur main road an chhuak chiah chu suin, an piaha awm Lalchhuanawma hi a su ve leh nghal. Thanngaia hi Civil Hospital, Aizawl panpui a nih hnuah zan dar 11:45 velah a thi a, Sihhmuia a chhungten ruang an la. Lalchhuanawma hi Sairang PHC panpui a nih hnu lawkah a thi a, an khuaah a ruang lak a ni.
Scooty khalhtu Lalliansanga pawhin hliam tuarin, damdawi inah enkawl mek a ni.
