ZPM-in thuchhuah siamin sawifiah

ZPM chuan thuchhuah siamin ni 6.7.2024 khan MNF Legislature Party chuan press conference koin Zoram mipuite hriata thu dik tawk lo an pholang nia tarlangin, 'Pawi kan ti a, heng thil hrang hrangah-te hian thil awmzia leh thu dik zawk tarlan thain kan hria a ni,' a ti.

Sawrkâr tharah politician inrawlh lohna  State Purchasing Advisory Board (SPAB) kaltlanga Chief Secretary hoin buhfai supply-tu thlan a nih thu tarlangin ZPM chuan, 'Hei hi kalphung thar sawrkâr rah chhuah niin kan hria a, lawmawm kan ti hle. Hetihlai hian, sawrkâr hmasa-ah ni 2.5.2023 khan SPAB kaltlang loin, Chief Minister thu hmuin dan loin buhfai supply-na man uchuaka taka tihsan a ni a, buhfai hi quintal-ah Rs 3,025 aṭangin Rs 3,400 ah tihsan a ni,' tiin Chief Minister-in a duhsak zâwngte  dan loa buhfai supply-na man a tihsân sak avânga sawrkârin sum a chawi belhna chu quintal-ah Rs 375 niin an tarlang.

ZPM chuan MNF MLA-te'n  buhfai man tihsân chungchânga sawrkâr demna thu an au chhuahpui chu ram hruaina kawngah a rilru mumal neih loh thlâk an tih thu tarlangin, 'MNF Sorkâr hnuaiah buhfai man tihsânna tur hian committee hial lo din tawh niin, Deputy Chief Minister kaihhruaina hnuaiah 'Committee on matters relating to Non-NFSA Act 2013 (Above Proverty Line) benefeciaries and revision of issue price of non NFSA rice' din niin, he committee ni 17.1.2022 a thukhawm chuan, card var ration buhfai man tihpun chu an lo pass daih tawh zawk a, an meeting minute pawh en theihin a awm a ni,' an ti.

Phuldungsei khuaa mithenkhat ration card paihsak ni a thuthang chungchangah pawh mipuite hian thu dik tak kan hriat a tul tih tarlangin ZPM chuan, 'India Sawrkarin End to End Computerisation of Targeted Public Distribution System (TPDS) kal puiin, he scheme-in management system hran a hman Ration Card Management System (RSMS) hi Adhaar Card hmanga finfiah ngai a nih avângin adhaar pakhat hi ration card pakhatah chauh chhinchhiah theih a ni. Heivâng hian Phuldungsei-a mi thenkhat ration card chu Tripura lamah lo register tawh anih avângin RCMS khawl hmanga chhinchhiah theih an ni lo zawk a ni. Hnam inpumkhatna hi ZPM kaihhruai sawrkârin a ngaih pawimawh êm êm,' tiin Mizoram chhûng leh pawna Zofate inpumkhatna tur hi kaihhruai sawrkârin mut mawh hnar mawha a nei mek niin an tarlang.

ZPM chuan thu belhchian dawl lo hmanga inpuh hi politics kalphung hlui a nih avângin Zoram mipuite'n an ning tawh nia tarlangin, 'Heivang hian Zoramah kalphung thar, mipui sawrkâr a lo pian phah a ni. Opposition party-te chu thu dik tawk lo hmanga mipui rilru kawih her tumna  bansan a, thil ṭha tih kawnga inelpui atân kan sâwm a, kan ram rorelna-ah Pathian ram tun dina a awm theihna turin dikna leh rinawmna nen ZPM Party chu huaisen takin a kal zel dawn a ni,' a ti.