Tuirial Hydel Project kama thing kit thin

Kolasib Sub. Hqrs. YMA chuan thuchhuah siamin Tuirial Hydel Project (HEP) kama thingte nasa taka kih chereu a nih mek thu leh dan loa thingzai nasa taka phurh reng a nih thu an tarlang.

Thing nasa taka kih a ni leh dan loa thingzai nasa taka phurh a ni reng chu Kolasib Sub. Hqrs. YMA chuan pawi an tih thu tarlangin, 'Tuirial chawmtu tuihna tikangin, kan environment pawhin a tuar nasa hle dawn. He mi chungchang hi sorkar thuneitute pawh sawipuiin, hmala tura ngenna kan thlen tawh thin. Amaherawhchu, dan loa thingzai  leh phurh chhuah hi a la pangngai reng tihhriat a ni,' an ti.

Kolasib Sub. Hqrs. YMA chuan dan loa thing zai leh phur thinte chu ti tawh lo turin an ngen a, 'Sub-Hqrs YMA, Kolasib Rorel inkhawmin a lo rel angin, hetianga ti thinte an awm zui em tih duty neiin uluk takin kan vil mek. Chak zawk leh na zawka hma lak chhohzel pawh tum a ni,' tiin dan loa thing zai leh phur man an awm chuan hriatthiamna awm loa thuneitute hnenah dan anga hrem tura hlan zel an nih tur thu an tarlang.