CM-in Bana Kaih Scheme a tlangzarh

Chief Minister Lalduhoma chuan vawiin (19.9.2024) hian Vanapa Hall-ah Mizoram Sorkar Flagship programme 'Bana Kaih (Handholding) Scheme' a tlangzarh a, scheme book pahnih 'Bana Kaih Mizoram Handholding Scheme' leh 'Thlai thar hralh dan tur kaihhruaina tawi' tih pawh a tlangzarh nghal.

Lalduhoma chuan hun rei tawh tak atanga an suangtuah tawh thin 'Bana Kaih Scheme' tlangzarh a ni ta chu lawmawm a tih thu sawiin, policy a hlawhtlin theih nana theihtawp chhuahtu leh thlawp tlat thintute inpekna ropui a tih thu a sawi a, 'Thlai thar pali lei nan sum dah fel a ni. Society kaltlanga lei tura ruahmanna duan a ni a, society chu politics tel lo, hruaitu tha leh mi thahnemngaite kaihhruai a ni tur a ni,' a ti. 

Rate tha zawk Rs 50 chunglama sawhthing hralh theite chu sawrkarin a buaipui dawn lo tih sawiin Chief Minister chuan, 'Rs. 50 tling lova an hralh erawh chuan a tlin lohna  zat kha sawrkarin a hnawhkhah sak thung ang,' tiin thlai thar lei tura sawrkarin a lo puan tawhte bakah khan Kolasib leh Mamit District-ah kumina buhhum tharte kg. ah Rs 30- zela leisak tum a nih thu a sawi.

Bana Kaih Scheme chu thawkrim leh taimate tana siam a nih thu sawiin Lalduhoma chuan, 'Hmelhriat leh insawipui hmanga hmuh ve mai theih a ni dawn lo. Implementing Department hnuaia Search Committee-te'n endikna an kalpui hnuah chauh progress partner-te thlan an ni ang. Progress partner-te tan sawrkar chu quarantor-ah a tang ang a, loan rul thate chu an loan interest sawrkarin a pe let leh vek ang, rul tha lo te erawh chu bank-in dan a siam anga an chunga hmalak a nih bakah a tul angin handholding portal-ah an hming tar chhuah a ni ang. Handholding Loan component atan hian SBI, MRB leh MCAB nena thawhhona ziah phawt tur a ni,' a ti.

Chawhnu lamah sawrkar hnathawk Deputy Secretary leh a chunglamte bakah SDO (C) leh BDO te pualin thlai thar lei tur chungchang inhrilhhriatna hun hman a ni. 

Bana Kaih Scheme ṭhenkhat :

# Kut hnathawktute, ran vulhtute, thilsiam chhuah lam buaipuitute, eitur sawngbawlna lam buaipuitute leh mahni kutkawiha eizawng bul ṭan tum (enterpreneur) te a huam

# Loan hmanga kalpui tur a ni a, cheng nuai 50 thleng a dil theih ang. Hemi bakah hian CM Special Package cheng nuai 1 thleng a awm ang

# Bana kaih tura thlan chhuahte chu Mizoram State Policy Coordination Committee-in list fel tak siamin bank-ah an thehlut ang