Fak Zai top 20 intihsiakna

Mizoram UPC kohhran thalai pawl, General PYD leh Literature & Publication Board-te tangkawpin an buatsaih, mal zai intihsiakna Pentecost Fak Zai chu zanin dar 8:00 hian top 20 intihsiakna tan a ni dawn a, zanin inelna hi a zan khatna tur a ni - naktuk zanah top 20 zan hnihna neih leh tur a ni ang. 

Kum 2022 khan Fak Zai hi a vawi khat nan neih a lo ni tawh a, tun hi vawi hnih neihna chiah a ni. July thla khan online kaltlangin audition round neih a lo ni tawh a, heta ṭang hian top 20 hi thlitfim a ni leh ta a ni. 

Mizoram UPC Conference Hall, Zonuamah neih Fak Zai hi Zonet Rimawi leh GPYD YouTube channel-ah te live-a pekchhuah ṭhin a ni ang. 

Fak zaiah hian Rev. Dr. Ngurthanpara Sailo, Upa F. Vanlalchama leh Mizo Idol neih hmasak ber a nih ṭuma top 10 zinga mi C. Lalmuanpuii te chu judge an ni dawn a, host hi Lalawmpuii leh Emilia Lalnunpuii te an ni thung.

Thlalak : host-te