Social media-a video darh vangin thukhawm

Tun hnaia Serchhip veng pakhata ruihhlo ngai nia rinhlelh thalai eng emaw zat a ruala vak, social media a video darh (viral) avangin Serchhip District Task Force on Ruihhlo Do chuan thutkhawm pawimawh an nei.

Meeting kaihruaitu Serchhip DC leh District Task Force on Ruihhlo Do Chairman Paul L Khuma, Serchhip DC chuan Serchhip khawpuiah thalai eng emaw zat ruihhlo bawihah an tang a, ruihhlo zuar ru eng emaw zat an awm nia a lan avangin tan lak nasat zual a ngai hle tih sawiin, 'Rei lote atan chauha ruihhlo tihrem hi a tawk lo a, engtinnge a rem hlen theih ang tih ngaihtuah a pawimawh,' a ti.

Meeting-ah hian sorkar force-te mai bakah tlawmngai pawlte leh kohhranho tanhona a pawimawhzia sawi lan a ni. Additional SP PSaidingliana Sailo kaihhruaina hnuaiah working committee din nghal niin, Serchhip District Police leh Excise-te mai bakah a remchan dan angin YMA Branch hrang hrang te leh VDP-te nen thawk ho a, hunbi neiin nasa lehzualin duty ni se, tiin an rel .

Ruihhlo ngai te kal tamna hmun nia ngaihah te leh ruihhlo zuarte awmna hmun nia ngaih hmun thenkhatah ngawrh lehzualin duty ni se, supply reduction ah nasa lehzualin tan lak ni se, an ti.