Airfield Branch YMA-in thuchhuah siam

Airfield Branch YMA chuan vawiin (6.1.2025) hian thuchhuah siamin, ni 18.12.2024 (Nilaini) zana Airfield Khuaa thil thleng chungchangah thu leh hla a tam hle tih tarlangin, 'Thil awmzia dik tak Airfield Branch YMA chuan Mizoram mipui hnenah hriattir tha a ti a, hetiang hi thil awm dan a ni,' an ti. 

Airfield Branch YMA tarlan danin, Airfield Vengthar Pastor Quarters chu misual tu tih hriat lohten Nilai zan (18.12.2024) inkhawm hlanin rawk a ni a, pawisa Rs. 24000 a bo thu hriat a a ni.

Khawtlang hruaituten ngaihven nghalin, inkhawm tan hma lawka Pastor qtr. bulhnaiah drugs addict leh rukru thang taka Khawtlangin a hriat David Lalmuanpuia (L) s/o Nunthangmawii leh Lalduhsaka s/o Parchhuani, Airfield Vengte chu hmuh an nih avangin, khawtlang hruaituten VDP Office-ah kovin, an thil tih dante zawh an ni.

Tha taka inpuangin Pastor quarters a lut a pawisa pawh an lak ngei thu an sawi ta ani. (An inpuanna video pawh kawl that a ni). An inpuan hnuah an pawisa ruk an dahna an sawi angin enfiah nghal zel a ni a, hmuhchhuah a ni ta lo a ni. 

Hetia dawt a sawi kual reng avang leh mi pawi a khawih tam tawh avangin VDP Office-ah hian Davida hi kawl zui a ni ta a ni Hun eng emaw ti hnuah unconscious-a awmin damdawi in panpui anih hnu ah mihring a lo chang zo ta lo a ni.

Airfield Branch YMA chuan vanduaina lo thleng ta hi pawi an tiin, lusun chhungte an tawrhpui takzet tih an tarlang. 

He thil thlengah hian dan kengkawhtu leh Airfield Veng awptu Bawngkawn Police Station-ten hma an lakzui vat avangin, Airfield Branch YMA te chuan ngaichangin, reitak ngawih kan chuh hnuah thu leh hla atam tak em avangin hreh tak chungin thil awmzia an han tarlang ta a niin an tarlang. 

He thil thleng avanga mawhphurtu ni lo leh dem tur ni lote thleng thlenga social media lama sawiselna leh diriamna tamtak hmuhtur a awm pawi an ti takzet tih tarlangin Airfield Branch YMA chuan, 'Zu leh ruihhlo khawtlangin a dona kawngah tawhsual tawh palh chang a awm thin tih hretu Mizoram mipuite leh YMA member-te hriatthiamna kan dil a, Mizoram puma khawtlang tana hlawh leh phutlet nei hauh loa a thim avar thlu lova tha leh zung thawhtute zawng zawng tha thlah lova kalzel kan duhin, khawtlang venhim kawnga min thawhpui duh tute englai pawhin kan thawhpui zui zel ang tih kan tarlang nghal bawk a ni,' a ti.