Jordan Centre engtin zel?

Social Welfare & Tribal Affairs (SWTA) Department chuan ruihhlo ngaite enkawlna hmun Jordan Centre, Sethawn enkawl duh an zawnna chu huntiam chhungin chhang an awm lo.

Jordan Centre enkawl duh zawnna Invitation of Expression (IoE) chuan SW&TA Department hian November, 2024 tawp lam khan invitation of expression (IoE) an chhuah a, chhan theih hun December 19, 2024 tlai dar 4 thleng a chhang duh tan hun an hawng. Huntiam chhung hian chhang an awm loa, engtianga kalpui zel tur nge tihah department chuan thutlukna an la siam lo.

June 18, 2024-a Council of Ministers ṭhukhawm chuan Jordan Centre chu mi dang kuta hlan a remti a, chumi bawhzui chuan SW&TA Department hian IoE hian an chhuah a ni.

SW&TA-in a ruahman dan chuan, Jordan Centre enkawl duh an awm a, an enkawl tum dan pawmsak a nih chuan kum 5 chhung atana enkawltir phawt tur a ni a; kum 5 a zawh hnuah ennawn leh a ni ang.

Enkawl duh an awm chuan Jordan Centre-ah hian mi 60-80 inkar enkawl tura beisei an ni a; centre-a awmte atangin a enkawltute'n fee an lak remtih a ni a, fee zat erawh SW&TA-in a pawmpui a ngai dawn thung.