Tetea Hmar-in thiam a chang

MNF-in Election Model Code of Conduct bawhchhiaa an puh chungchangah Minister of State Lalnghinglova Hmar chuan thiam a chang.  State Election Commissioner (SEC) chuan vawiin (4.2.2025) hian order a ti chhuak. 

SEC Order (A ngai ngaiin) 

MNF General Headquarters Complaint thehluh, Hon'ble Minister of State Pu Lalnghinglova Hmar-in Model Code of Conduct for Election Conducted by State Election Commission, Mizoram, 2025 bawhchhia-a an puhna (Vide letter No. MNF/2025-3, dated: Aizawl, the 30th January, 2025) leh Minister Pu Lalnghinglova Hmar-in State Election Commission, Mizoram hnena a insawifiahna thehluh (Vide letter No.PB/MOS/LESDE/SYS/END/2023/32/92, dated: Aizawl, the 3rd February, 2025) chu State Election Commission chuan ngun taka a ngaihtuah hnuah hetiang hian thutlukna a siam a ni.

Minister Pu Lalnghinglova Hmar hian State Election Commision thupek angin a hun takah a rawn chhang a, MCC bawhchhiatna a neih loh thu a sawi a ni.

State Election Commission thlir danin, Election Model Code of Conduct (MCC) Para - VIII (2) leh (14) bawhchhia nia an puh chungchangah Minister hian an Party mite hmaah Sawrkar hmalakna awm tawh sa leh hma lakna kal mek chungchang a hrilhfiah mai nia a lan avangin, Model Code of Conduct bawhchhiatna a ni lova; Model Code of Conduct-in a sawi hmasawnna lam hawia bul tanna lung phum leh policy thar puan te, thawh zawh tawh hawnna emaw chutiang lam kaihhnawih hawnna inkhawm buatsaih leh ruahhmanna thar lam hawi reng reng puan chhuah loh tur tih hian a huam lo a ni.

Minister hian, "Model Code of Conduct (MCC) hi party tinin tanhmun inang (Level Playing Field) neia inthlan kan hmachhawn theih nana siam a nih avangin a zahawm a, MCC in inkaihhruaina hrang hrang a siamte hi tha taka zawm chhunzawm zel ka tum ang", a tih ang ngei hian fimkhur taka inthlan kaihhruaina zawm tura beiseiin a hriattir a ni.