Cambodia-a Mizo awmte'n thuchhuah siam

Cambodia Mizo Welfare chuan thuchhuah siamin, hna tha lo tih hre sa reng chunga Cambodia-a lut lui lo turin Mizo mipuite an ngen.

Cambodia ramah Mizo - ei zawng leh rawngbâwlin an awm ve ta nual tih tarlangin Cambodia Mizo Welfare chuan, 'Kan la luh belh zêl dâwn ni pawhin a lang. Kan Mizo unaute, Cambodia rama rawn kal tum zawng zawng kan lo lâwm vek che u . Hna ṭha tak thawk tûr leh zin veivâka rawn kal zêl tûr pawhin kan duhsak che u a ni. Chutih laiin India mi, hna ṭha lo (scam) thawk (mi 40000 chuang niin an sawi) Cambodia rama an awm avângin India mi tân Cambodia a hna thawk tûra luh a harsat phah ta hle,' an ti.

Hun eng emaw chen chu India, Pakistan, Nepal tân visa an khâr phah hial tih tarlangin Cambodia Mizo Welfare chuan, 'Hetiang a nih avâng hian hna ṭha lo a ni tih hre sa reng chunga lo lût lui lo tûrin kan Mizopuite kan inngên. Hêng mite chunga harsatna a thlenin anmahni puih chungchângah Mizo Welfare kan inrawlh lo a nih pawhin Mizo mipuite hriatthiamna kan ngên lâwk a ni,' tiin call center, casino leh spa-a thawk tûra hna awm târ lanna (advertisement) ahte hian fîmkhur a ngai zual niin an tarlang.

Cambodia Mizo Welfare tarlan danin, ccam company-te chuan online-in mi bum tûr an zawng a, mite pawisa neihsak dan kawng zawn chu an hna a ni ber mai. Work permit leh visa tih felsak vek bâkah hlawh ṭha tak pêk intiamin hna thawktu tûr an zawng fo ṭhîn. Inbumna (scam) a ni tih hre sa a, an hlawhte a ṭhat avânga thawk duh an awm reng tho. Mi ṭhenkhat chuan inbumna a ni tih hre loin an dîl a, Cambodia ram an rawn luh hnua inbumna a ni tih hre ta chauhte pawh an awm ṭhin. 

Chhuahsan leh an duhin inlâk chhuah mai a harsa tawh thîn tih tarlangin Cambodia Mizo Welfare chuan, 'Mizo Welfare pawhin an lo buaipui tawh ṭhîn a ni. Nu leh pate pawhin hna zawn chungchângah kan fate kan fîmkhurpui a ṭha hle mai. Khualzina lo kal emaw hna ṭha thawka lo kalten harsatna (dam lo, passport, pawisa tibo etc) an tawh chuan Mizo Welfare-in puih kan inhuam reng a ni.' tiin Mizo hnam leh Mizoram tihmingchhe lo tûrin Mizo mipuite an ngen.