IAF kutah airport ka pe dawn lo - TBC Lalvenchhunga

ZPM chuan vawiin (17.2.2025) chhun khan an office-ah chhung inkhawm an hmang a, thusawitu Working Committee on Lengpui Airport Chairman TBC Lalvenchhunga, Adviser to CM chuan Indian Air Force (IAF) kutah Lengpui Airport an pek dawn loh thu a sawi.

TBC Lalvenchhunga chuan Mizoram Sawrkarin IAF kutah Lengpui Airport an pe dawn lo tih sawiin, 'Kan ramin a hlawkpui theihna tur leh changtlung zawka siam kan tum mai a ni. Ram siamthat kan tumna kawngah administrative reform huai takin kan kalpui mek a, hun rei lote chhunga kan hnathawhte avangin Sawrkar Laipui atangin beisei phak loh sum tam tak kan dawng tan mek a ni,' a ti.

Mizorama ZPM a awm hnuah danglamna nasa tak a thleng nia sawiin Adviser to CM chuan, 'Inthlan leh a vuakvet a felfai a, ruaitheh leh lawman siam mup mupte a boa, tuna Local Council inthlan kan zawh takah pawh party naupan ngaihtuahin hma kan sawn em em,' tiin Local Council leh Village Council-a seat tlemte nei ve chauh kha tunah chuan a sang berah an awm tawh thu a sawi.

TBC Lalvenchhunga chuan tunlaia lar em em airport chungchangah mimal pawhin an bei nasa tih sawiin, 'Lengpui Airport hi naktuka hlan mai tur niawm tak hian kan rilruah a awm deuh niin ka hria a, mithiam tak tak te nen zirchianna hrang hrang kan nei a, Wing Comdr. Pu J Lalhmingliana hi kan zirchiannaa kan thawn hmasa ber a, min chhanna chu airport kan enkawl zawh loh thu leh AAI-in a dratf an neih ang hi IAF atangin nei ve phawt rawh u, tiin thurawn min pe a ni. A thurawn anga kan kal mek lai chuan a ni lo zawngin media hrang hrangah te min han sawi ta a, wing commander senior dangte leh service lai mekte pawh kan rawn nasa hle,' a ti.