Lirthei chesualah mi pahnih an thi

Zanin (13.3.2025) thimhlim khan Khawruhlian khawhnuai, Ralkai peng bulah Bolero Accident avangin motor chhunga chuang mi 4 zingah mi pahnih an thi a, mi pahnihin hliamna tak an tuar.

Khawruhlian atanga thudawn danin, zanin thimhlim dar 6:40 vel khan Khawruhlian khawhnuai, chhim lam, National Highway ah sorkarin hmasawnna hna a thawh hrang hrang endika kal PWD hnuaia hnathawk EE leh SDO bakah JE leh driver-te chu Bolero MZ 01 P 6655 a chesualin kawng thlang lamah an liam a, kawng atangin meter 200 vel motor hi a lum a ni.

Motor khalhtu Lalnunmawia, Aizawl Venglai leh Biakzuala (BZA) JE, PWD Electric Veng, Aizawl te chu ka pawh chhawn loin an thi. RC Lalramzauva EE, PWD Tlangnuam Aizawl leh C.Vaninmawia SDO, Champhaite chu hliam tuarin Khawruhlian PHC ah thlenpui nghal an ni.

Thudawn danin, PWD hotute hian sorkarin hmasawnna hna a thawh hrang hrang endikin an kal kuala, ni 12.3.2025 khan Suangpuilawn atangin Sakawrdaiah riakin, tukin, ningani zing khan Zohmunah Godown sak hna an endik a, Sakawrdaia Sinlung Office sak endik zawh hnuah Darlawna Hall sak mek an en bawk. Hmasawnna hnathawh an endik Aizawl lam an panna lamah an chesual ta a ni.